चाँगुनारायण नगरपालिकाले सातौं नगर सभाद्वारा पारित आर्थिक वर्ष २०७७/७८ को नीति, बजेट तथा कार्यक्रम पुस्तिका सार्वजनिक गरेको छ । 

नगरपालिकाले शनिवार आयोजना गरेको पत्रकार सम्मेलनमा नगर प्रमुख सोमप्रसाद मिश्र र उपप्रमुख बिना बाँस्तोलाले पुस्तिका सार्वजनिक गरे ।

पत्रकार सम्मेलनमा आर्थिक वर्ष २०७६/७७ मा चाँगुनारायण नगरपालिकाले ५० करोड रुपैयाँ लागतमा सुविधासम्पन्न आफ्नै भवन निर्माण गर्ने भएको छ । वडा नम्बर ५ घुमाउनेमा रहेको सार्वजनिक जग्गामा नगरपालिकाको भवन निर्माण शुरू गर्ने भएको नगरपालिकाका प्रवक्ता एवं वडा नम्बर ८ का वडाध्यक्ष परासर सापकोटाले जानकारी दिए ।

नगरपालिकाले सबै वडा जोड्ने फास्ट ट्रयाक, नयाँ सडकको ट्रयाक निर्माण, मुख्य सडकमा बत्तीको व्यवस्था गरी उज्यालो नगर बनाइने, सार्वजनिक जग्गा संरक्षण तथा वनपधेँरी बाँस्तोला गाउँमा झोलुङ्गे पुल, पर्यटन र सिँचाइका लागि बोजिनी ड्याम, चाँगुनारायण मन्दिरमा हजार सिँढी, भँगेरीडाँडामा अन्तर्राष्ट्रिय रंगशाला र एक वडा एक खेलमैदान निर्माण गरिने भएको छ । 

विदेशबाट फर्किएका र बेरोजगार रहेका युवावर्गलाई लक्षित गरी नगरपालिकाले ‘मेयर उद्यमशीलता विकास कार्यक्रम’ सञ्चालन गर्दै शून्य प्रतिशत ब्याजमा ऋण प्रवाह गर्ने भएको छ । ‘चाँगुनारायण उद्यमशीलता कोष’ खडा गरी ऋणका ब्याज नगरपालिकाले नै तिरिदिने गरी स्वरोजगार प्रवद्र्धन गर्ने भएको हो ।

नगरपालिकालाई विषादीमुक्त खाद्यवस्तुमा आत्मनिर्भर बनाउने, नगरस्तरीय शीतभण्डार निर्माण गर्ने, प्रत्येक वडामा कृषि उपज केन्द्र स्थापना गरिने, रोजगारमूलक कृषिमा अनुदान प्रदान गर्ने, खेतीमा जैविक मलको प्रयोग बढाउने, हरित चाँगुनारायणका लागि घरघरमा अनिवार्य फलफूलका बिरुवा रोप्ने कार्यक्रम शुरू गरिने भएको छ ।

सामुदायिक विद्यालयमा छात्राको शिक्षा र सुरक्षित भविष्य निर्माणमा टेवा पुर्‍याउने उद्देश्यले नगरपालिकाले ‘वचत खाता छोरीको, सुरक्षा जीवन भरीको’ कार्यक्रम लागू गर्ने भएको छ । नगर प्रमुख मिश्रले यसबारेमा जानकारी दिँदै भने, ‘चाँगुका प्रत्येक छोरी अब कम्तीमा कक्षा १२ सम्म पढ्छिन्, छोरीले बीचमै स्कूल छाड्ने क्रम अब रोकिन्छ, यो रकमले छोरीको उच्च शिक्षासम्मको पहुँच वृद्धि हुन्छ, छोरीको विवाह २० वर्षपछि मात्रै हुन्छ, जसले बालविवाह रोक्छ ।’