सत्तारूढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहाल 'प्रचण्ड'ले यतिबेला पार्टीभित्रै राष्ट्रघात र राष्ट्रवादको कित्ता छुट्ट्याइएकोमा आपत्ति जनाएका छन् । 

आइतवार चितवन जिल्ला पार्टीद्वारा आयोजित कार्यकर्ता भेटघाट कार्यक्रममा सम्बोधन गर्दै प्रचण्डले नेपालको अद्यावधिक नक्सा प्रकाशन गर्न र संवैधानिक मान्यता दिलाउन आफू लागिपरेको स्मरण गर्दै के त्यो लम्पसारवाद थियो भनेर प्रश्न गरेका छन् । 

'हामी मिलेरै नाकाबन्दीको सामना गरेका हौँ, नक्सा प्रकाशित गरेका हौँ,' प्रचण्डले भने, 'स्थायी कमिटी बैठकमा सरकार र सरकारको नेतृत्वकर्ता केपी ओलीलाई सबैले धन्यवाद दिएकै हो । के अब मुर्दावाद र जिन्दावादको कुरा गर्न जरुरी छ ? सबैलाई विनम्रतापूर्वक आग्रह छ, पार्टीलाई एकताबद्ध राखिन्छ । सबैले एकता जिन्दावादको नारा लगाऊँ ।' 

उनले गत साल मङ्सिरमा बसेको स्थायी कमिटीको बैठकमा तुरुन्त नक्सा प्रकाशित गर्नुपर्छ भनेर स्थायी कमिटीबाट सर्वसम्मत निर्णय गराएको स्मरण गर्दै प्रश्न गरे, 'के त्यो लम्पसारवाद थियो ? केन्द्रीय कमिटीको बैठकबाट ढिलो नगरी नक्सा प्रकाशित गर्नुपर्छ र जरुरी पर्छ भने संवैधानिक व्यवस्था पनि गर्नुपर्छ भनेर मैले भनें र निर्देशन दिइयो, के त्यो लम्पसारवाद हो ?' 

उनले सच्चाइ के हो सबैले आफ्नो छातिमा हात राखेर भन्न सक्नुपर्ने बताए ।

'सच्चाइ के हो भन्ने हामीले छातिमा हात राखेर भन्नुपर्छ,' उनले भने, 'एउटा गएर केपीलाई प्रचण्डलाई छोड्न हुन्न भन्ने र अर्कोले प्रचण्डलाई आएर केपीलाई छोड्न हुन्न भन्ने प्रवृत्तिका विरुद्धमा लड्नुपर्छ । यो पार्टीलाई एकतावद्ध राख्नु नै छ ।'

उनले विगतमा केपी ओलीको सरकारले चीनसँग ट्रेड एग्रीमेन्ट गरेको र आफ्नो नेतृत्वको सरकारले बीआरआई सम्झौता गरेको स्मरणसमेत गरे । 'त्यतिबेला तत्कालीन एमाले र माओवादीबीच ठूलै द्वन्द्व भएजस्तो देखिन्थ्यो तर पनि मेरो र ओलीको बीचमा खुलेर कुरा हुन्थ्यो,' उनले भने, 'ओली प्रधानमन्त्री हुँदा ट्रेड एग्रीमेन्ट भयो, म हुँदा बीआरआई सम्झौता भयो ।'

उनले आफूले मधेशवादी दलहरूलाई पनि इन्गेज गराएर निर्वाचनको माहोल तयार गरेको बताए । 

'निर्वाचन हुन्छ त भन्ने थियो तर प्रशस्त शंकाहरू थिए,' उनले भने, 'मैले मधेशलाई पनि इन्गेज गराएर निर्वाचनमा गएँ । निर्वाचन प्रक्रिया शुरू भयो, असाध्यै ठूलो संकटबाट देश पार लाग्यो । मेरो सरकार हुँदा लोडसेडिङ अन्त्य भयो, त्यो लम्पसारवाद थियो त ?'

उनले गत मङ्सिर ४ गते आफू पार्टीको कार्यकारी अध्यक्ष हुने सम्झौता भएको तर त्यो राम्रोसँग लागू नभएको बताए ।