भारतले भुटानको यती क्षेत्रमा सडक बनाउने योजना सार्वजनिक गरेको छ । त्यो बनेपछि गुवाहाटी र अरुणाचल प्रदेशबाट तवाङको दूरी १५० किलोमिटर घट्नेछ । 

भुटानको यती क्षेत्रलाई चीनले हालै मात्र आफ्नो अधिकारक्षेत्र भनी दाबी गरेको थियो । 

यो सडक बनाउँदा भारतलाई रणनीतिक फाइदा हुने बताइएको छ किनकि यो चीन सीमा हुँदै जानेछ । 

सडक बनेपछि भारतले चीनभन्दा छिटो सीमावर्ती क्षेत्रमा फौज तैनाथ गर्न सक्नेछ । तवाङ मात्र नभई भुटानका पूर्वी क्षेत्र तथा उत्तरपूर्वी राज्यमा चीन सीमामा सेना छिटो पुग्न सक्नेछ ।

भारतीय पत्रिका इकोनोमिक टाइम्समा छापिएको खबरअनुसार, भारत सरकारले बोर्डर रोड अर्गनाइजेसनलाई सडक बनाउने काम सुम्पेको छ । सडकले तवाङ नजिकैको लुमलालाई भुटानको त्राशीगाङसँग जोड्नेछ । 
यसले भारत र भुटानबीचको कनेक्टिभिटी पनि बढाउने अनि सुरक्षामा पनि अभिवृद्धि गर्ने बताइएको छ । 
 

विज्ञहरूका अनुसार, चीनले हालै भुटानको सुदूरपूर्वी क्षेत्रमा अधिकार जमाउन खोजिरहेको छ । उक्त क्षेत्र अरुणाचल प्रदेशको ९० हजार वर्ग किलोमिटर भागमा जोडिएको छ । अरुणाचललाई चीन आफ्नै भूभाग मान्छ । 
 

तवाङ तिब्बतको एक भाग भएको भन्दै चीनले त्यसमा पनि दाबी गरिरहेको हो । छैठौं दलाई लामा तवाङमा जन्मेका थिए । वर्तमान दलाई लामा पनि तवाङकै बाटो हुँदै भारत आएका हुन् । 

यसअघि चीनले भुटानको सुदूरपूर्वी क्षेत्रमा रहेको साकतेङ वन्यजन्तु आरक्षमा अन्तर्राष्ट्रिय फन्डिङलाई रोक्न खोजेको थियो । विवादित क्षेत्र भएकाले त्यो आरक्ष र त्यस वरिपरिका कुनै पनि भागमा फन्डिङ गर्न नमिल्ने उसको दाबी छ । 

भुटानले त्यसमा आपत्ति जनाउँदै दुई देशबीच पश्चिममा २६९ वर्ग किलोमिटर र उत्तरतिर ४९५ किलोमिटरमा मात्र विवाद रहेको बताएको छ । भुटानका अन्य सीमाहरू विवादरहित भएको भुटानको भनाइ छ ।