भारतको केरल राज्यको एर्नाकुलममा एक फोटोग्राफरले अस्पताल बाहिर प्रहरी मुचुल्काका लागि मृत व्यक्तिको तस्वीर खिचिरहेको बेलामा अनौठो घटना भएको छ ।

फोटो खिच्दै गर्दा सानो आवाज सुनिएपछि फोटोग्राफरलाई शंका लाग्यो र उनी मृत भनिएको व्यक्ति नजिक पुगे । उक्त व्यक्तिको मुखबाट सानो आवाज आइरहेको थियो । फोटोग्राफरले तत्कालै प्रहरीलाई खबर गरे ।

मरेको भन्ठानिएको व्यक्ति जिउँदै रहेछन् र अहिले उनको सघन उपचार चलिरहेको छ । 

फोटोग्राफरको नाम टोमी थमस हो । उनलाई एदाथाला प्रहरीले मृतकको तस्वीर खिच्न बोलाएको थियो । 

मरेको भनिएका व्यक्तिको नाम शिवदासन हो । 

उनको उपचार जुबली मिसन अस्पतालमा भइरहेको छ । चिकित्सकहरूका अनुसार, टोमीले सही समयमा शिवदासनको आवाज सुनेर नल्याइपुर्‍याएको भए उसको देहान्त हुने थियो ।
 

शिवदासन कालामस्सेरीमा भाडाको घरमा एक्लै बस्छन् । आइतवार एकजना व्यक्ति शिवदासानको घर जाँदा कुनै हलचल नदेखेपछि मरेको भन्ठानेर प्रहरीलाई खबर गर्न पुगे । उनले प्रहरीलाई सूचना दिएपछि अनौठो घटना हुन पुगेको हो ।