सौर्य सडकबत्ती निष्प्रभावी भएपछि तिलोत्तमा नगरपालिकाको ‘सिक्स लेन’ सडकमा विद्युतीय बत्ती जडान गरी सञ्चालनमा ल्याइएको छ ।

सडकबत्ती बलेसँगै रातिमा ‘सिक्स लेन’को ड्राइभर टोल–कोटिहवा खण्ड झिलिमिली देखिने गरेको छ ।

रातिमा सडक भएर यात्रा गर्ने अधिकांशले सडकको झिलिमिली आफ्नो मोबाइलमा कैद गरी सामाजिक सञ्जालमा पोस्ट गर्न थालेका छन् । सडकको झिलिमिली हेर्न साँझ भएपछि सडकमा मानिसहरू देखिन्छन् । 

'सिक्स लेन’ सडकको उत्तरी खण्डमा राखिएका सौर्यबत्ती निष्प्रभावी भएपछि तिलोत्तमा नगरपालिकाले आफ्नो क्षेत्रको बाँकी सडकमा विद्युतीय सडकबत्ती राख्न सम्बन्धित सडक आयोजनालाई आग्रह गरेको थियो ।

नगरपालिकाले विद्युत् प्राधिकरणसँग विद्युत् महशुल तिर्ने सम्झौता गरेपछि मात्र सिक्स लेन सडकमा विद्युतीय सडक बत्ती सम्भव भएको हो । तिलोत्तमाको योेगीकुटीदेखि ड्राइभर टोलसम्म र कोटिहवा दक्षिणको बाँकी भागमा पनि विद्युतीय सडक बत्तीको जडान हुने नगर प्रमुख बासुदेव घिमिरेले जानकारी दिए ।

बुटवल–बेलहिया ‘सिक्स लेन’ सडकमा २ वर्षअघि जडान गरिएका सौर्यबत्ती बल्न छाडेका छन् । १० वर्षको लागि भनेर जडान गरिएका सोलार बत्ती सडक निर्माण पूरा नहुँदै बिग्रिएपछि विद्युतीय सडक बत्तीको अवधारणा आएको हो । ‘सिक्स लेन’ सडकको डिभाइडर र दुवै तर्फको सर्भिस लाइनमा विद्युतीय बत्ती जडान गरिएका छन् । 

मुख्य डिभाइडरमा ३०/३० मिटरको अन्तरमा पोल राखिएको भने सर्भिस लेनमा विद्युत्कै पोलमा बत्ती जडान गरिएको छ । एउटा पोलको दायाँबायाँ १५० वाटका २ वटा बल्ब राखिएका छन् । ‘सर्भिस लेन’मा ४० वाटका बल्बहरू राखिएका छन् ।

सडकको डिभाइडरमा बल्ने बत्तीको महशुल नगरपालिका र सर्भिस लेनमा बल्ने बत्तीको महशुल सम्बन्धित टोल विकास संस्थाले व्यहोर्ने छन् । २ वर्षसम्म सडक बत्तीको मर्मत–सम्भारको जिम्मेवारी ठेकेदार कम्पनीले लिएको नगरपालिकाले जनाएको छ ।  

डिभाइडरको लागि ५ तथा सर्भिसलेनको लागि १५ स्थानमा विद्युत् कन्ट्रोलर राखिएको छ । स्वचालित सडक बत्ती अँध्यारो भएपछि सेन्सरले बल्ने र उज्यालो भएपछि आफैं निभ्नेछन् ।