पोखरा स्वास्थ्य विज्ञान प्रतिष्ठानमा बिहीवारदेखि स्नातकोत्तर तहको अध्यापन शुरू भएको छ ।

चिकित्सा शिक्षा आयोगबाट हाललाई १७ सिट स्वीकृत बमोजिम खुला १२ जना र सरकारीतर्फबाट ५ जना गरी १७ जना चिकित्सक विद्यार्थी भर्ना भएका छन् ।

उनीहरूको स्वागतमा प्रतिष्ठानले बिहीवार पोखरा–१० रामघाटस्थित प्रतिष्ठानमा आयोजित समारोहमा स्वागत तथा अभिमुखीकरण कार्यक्रम गरेको छ । 

गत वर्ष असोज १० गते आयोगको कार्यकारी समिति बैठकले प्रतिष्ठानमा जनरल सर्जरीमा ४, प्रसूति तथा स्त्री रोगमा ४, हाडजोर्नीमा २, जनरल मेडिसिनमा २, बालरोगमा २, एनेस्थेसियोलिजीमा ३ गरी कुल १७ सिट स्वीकृत गरेको प्रतिष्ठानका उपकुलपति प्रा.डा. बुद्धिबहादुर थापाले जानकारी दिए । तीमध्ये सरकारका तर्फबाट चिकित्सकलाई ९ र खुलातर्फका चिकित्सलकाई ८ सिट छुट्याइएको थियो ।

कार्यक्रममा प्रतिष्ठानका डीन नरेन्द्रविक्रम गुरुङ, सहायक डीन प्रा.डा. रविप्रसाद रेग्मी, प्रतिष्ठानका निर्देशक डा. अर्जुन आचार्य लगायतले प्रतिष्ठानका बारेमा बोलेका थिए ।

२०१३ सालमा सोल्जर बोर्ड अस्पतालको नाममा पोखरामै पहिलो पटक स्थापित पश्चिमाञ्चल क्षेत्रीय अस्पताल २०७२ माघ १२ देखि पोखरा स्वास्थ्य विज्ञान प्रतिष्ठानको रुपमा विकसित भएको हो । 

विश्वव्यापरुपमा फैलिएको कोरोना भाइरस संक्रमणको नियन्त्रण तथा उपचार सम्बन्धमा अस्पताललाई प्रदेश सरकारले कोरोना डेडिकेटेड अस्पतालको रुपमा सूचीकृत गरेको थियो । अस्पतालमा प्रि–आइसोलेसन र आइसोलेन वार्ड निर्माण गरी कोरोना संक्रमितको उपचार भइरहेको छ ।