शुक्रवार बिहान ११ बजे बस्ने भनिएको सत्तारूढ दल नेपाल कम्युनिस्ट पार्टी (नेकपा)को स्थायी कमिटी बैठक अपराह्न ३ बजेलाई सरेको छ ।

अध्यक्षद्वय केपी शर्मा ओली र पुष्पकमल दाहाल 'प्रचण्ड'बीच शुक्रवार बिहान भएको छलफलपछि बैठक ४ घण्टा पछि सारिएको हो ।

स्थायी कमिटी सदस्य देवेन्द्र पौडेलले बिहान बस्ने भनिएको बैठक अपराह्न ३ बजे बस्ने सूचना आफूलाई आएको लोकान्तरलाई बताए ।

'सहमतिका लागि निरन्तर कुराकानी भइरहेको छ,' पौडेलले भने, 'आजको बैठक ३ बजेलाई सरेको छ । नेताहरू अनौपचारिक रूपमा छलफलमै हुनुहुन्छ ।'

अध्यक्ष प्रचण्ड र वरिष्ठ नेता माधवकुमार नेपाल पक्षले प्रधानमन्त्रीसमेत रहेका अध्यक्ष ओलीको निरन्तर राजीनामा मागिरहेका छन् । सरकार र पार्टी संचालन राम्रोसँग गर्न नसकेको भन्दै ओलीको राजीनामा मागिएको हो ।

तर ओली भने राजीनामा नदिने पुरानो अडानमा देखिन्छन् ।

असार १० गतेदेखि शुरू भएको स्थायी कमिटी बैठकमा बोल्ने अधिकांश नेताहरूले प्रधानमन्त्री ओलीको राजीनामा मागेका थिए ।

सहमतिकै प्रयास गर्न भनेर असार १८ गतेयता पटक-पटक बैठक स्थगित गरिँदै आएको छ ।

स्थायी कमिटीबाट निकास ननिस्किने भन्दै केही नेताहरूले केन्द्रीय कमिटी बैठक बोलाउने मागसमेत गरेका छन् । स्रोतका अनुसार आज ३ बजे बस्ने स्थायी कमिटी बैठकले केन्द्रीय कमिटी बैठकको मिति तय गर्ने सम्भावना रहेको छ ।