नेपाल राष्ट्र बैंकले कोरोनाभाइरस (कोभिड- १९) को असर कायम रहेसम्म बैंक तथा वित्तीय संस्थाहरूको एटीएमको अन्तरआबद्धतालाई निरन्तरता दिने भएको छ ।

आर्थिक वर्ष २०७७/०७८ को मौद्रिक नीति सार्वजनिक गर्दै राष्ट्र बैंकका गभर्नर महाप्रसाद अधिकारीले कोभिड- १९ को असर रहेसम्मका लागि एउटा बैंकको कार्ड प्रयोग गरी अर्को बैंकको एटीएम मेसिनबाट पैसा झिक्दा अतिरिक्त शुल्क नलाग्ने व्यवस्थालाई निरन्तरता दिने घोषणा गरेका हुन् ।

'बैंक तथा वित्तीय संस्थाका एटीएमको कारोबारबीच अन्तरआबद्धता हुने व्यवस्था गरिनेछ । कोभिड– १९ को असर रहेसम्मका लागि एक संस्थाको एटीएम कार्ड अर्को संस्थाको एटीएममा प्रयोग गरेमा शुल्क नलाग्ने व्यवस्था मिलाइने छ,' मौद्रिक नीतिमा भनिएको छ ।

कोरोना संकटकाबीच लागू भएको यो व्यवस्था बैंक तथा वित्तीय संस्थाहरूले आजकै मितिबाट हटाउने घोषणा बिहीवार मात्र गरेका थिए । राष्ट्र बैंकले मौद्रिक नीतिमार्फत त्यसलाई उल्ट्याइदिएको छ ।