कर्णाली सरकारको आधा बजेट खर्च भएन, झण्डै १८ अर्ब जगेडा

शेरबहादुर थापा
शेरबहादुर थापा

लोकान्तर संवाददाता थापा कर्णाली प्रदेशबाट रिपोर्टिङ गर्छन् ।

गत आर्थिक वर्ष २०७६/७७ का लागि कर्णाली प्रदेश सरकारले विनियोजन गरेको ३४ अर्ब ३५ करोड बजेटमध्ये १७ अर्ब ९९ करोड रुपैयाँ बजेट खर्च हुन नसकी जगेडा भएको छ ।

वर्षभरि कर्णाली सरकारले १६ अर्ब ३६ करोड रुपैयाँ मात्रै खर्च गरेको छ । खर्च रकम कूल बजेटको ४७ दशमलव ६५ प्रतिशत मात्रै हो ।


Advertisement

पुँजीगत तर्फको २१ अर्ब २९ करोड ३७ लाख ७२ हजार बजेटमध्ये ९ अर्ब १२ करोड ७२ लाख २४ हजार ८४२ रुपैयाँ खर्च गरेको आर्थिक मामिला तथा योजना मन्त्रालयका उपसचिव दिलिप केसीले बताए । 

उनका अनुसार सरकारले विनियोजन गरेको पुँजीगत रकममध्ये १२ अर्ब १६ करोड ६५ लाख ४७ हजार १५८ रूपैयाँ जगेडा भएको छ । 


Advertisement

प्रदेश सरकारले चालूतर्फ विनियोजन गरेको १३ अर्ब ५ करोड ९६ लाख ५३ हजारमध्ये ७ अर्ब २४ करोड २० लाख ४० हजार २५४ रूपैयाँ खर्च गरेको छ भने ५ अर्ब ८१ करोड ७६ लाख १२ हजार ७४६ रुपैयाँ जगेडा भएको छ ।

प्रदेशको भूमि व्यवस्था, कृषि तथा सहकारी मन्त्रालयको ७८ करोड १ लाख ९५ हजार ३३५ रुपैयाँ, उद्योग, पर्यटन, वन तथा वातावरण मन्त्रालयको १ अर्ब ३९ करोड २७ लाख १३ हजार ५२९ रुपैयाँ, सामाजिक विकास मन्त्रालयको १ अर्ब ९० करोड ७८ लाख ३२ हजार १९० रुपैयाँ, भौतिक पूर्वाधार विकास मन्त्रालयको ६ अर्ब १ करोड ९८ लाख ५ हजार ४५० रुपैयाँ जगेडा भएको छ ।

मुख्यमन्त्री तथा मन्त्रिपरिषद्को कार्यालयको ४ अर्ब ५ करोड ९२ लाख ५५ हजार ९०६ रुपैयाँ, आन्तरिक मामिला तथा कानून मन्त्रालयको २७ करोड १९ लाख ६४ हजार २९२ रुपैयाँ, कर्णाली प्रदेश सभाको ५ करोड ७९ लाख ५४ हजार १४८ रुपैयाँ, मुख्य न्यायाधिवक्ताको कार्यालयको ६८ लाख ६५ हजार २९४ रुपैयाँ, कर्णाली प्रदेश योजना आयोगको ४ करोड ४१ लाख ८७ हजार १८ रुपैयाँ जगेडा भएको छ ।

कर्णाली प्रदेश सरकारले साढे २ वर्षको अवधिमा एउटा चौमासिक र ३ वटा पूर्ण वार्षिक बजेट ल्याइसकेको छ । जसमध्ये १ आंशिकसहित २ वटा बजेट कार्यान्वयन अवधि पूरा भइसकेको छ । आर्थिक वर्ष २०७४/०७५ मा ४ महिनाका लागि १ अर्ब २ करोड ५ लाखको बजेट ल्याइएकोमा २४ करोड ५ लाख रुपैयाँ खर्च हुन नसकेर जगेडा भएको थियो । आर्थिक वर्ष २०७५/७६ मा २८ अर्ब २८ करोड २८ लाख २८ हजारको बजेट ल्याएकोमा १८ अर्ब ४७ करोड ६२ लाख ४७ हजार रुपैयाँ खर्च हुन सकेको थिएन ।
 
चालू आर्थिक वर्ष २०७७/७८ का लागि प्रदेश सरकारले ३३ अर्ब ७४ करोड १३ लाख ५३ हजार रुपैयाँको बजेट ल्याएको छ । प्रदेश सरकारले बर्सेनि बजेट खर्च गर्न नसक्नुले निराशा बढाएको प्रमुख प्रतिपक्षी दल नेपाली कांग्रेसका नेता जीवनबहादुर शाहीले बताए । ‘सरकारले जहिले पनि ठूलाठूला सपना देखाउँदै आइरहेको छ तर सरकारले देखाएका सपना थोरै पनि पूरा हुन सकेनन्,’ उनले भने, ‘नागरिकले बजेट नपाउने तर सरकारले भने केन्द्रबाट आएको बजेट पनि हरेक वर्ष केन्द्रमै पठाउने गर्नु दुःखद हो ।’

शेरबहादुर थापा
शेरबहादुर थापा

लेखकबाट थप...

कमेन्ट गर्नुहोस्