शुद्धोधनले निर्माण थालेको दर्वाह पार्क तोडफोड, विद्यालयका प्रअलाई कारबाहीकाे माग

रूपन्देहीको शुद्धोधन गाउँपालिकाले निर्माण गर्न थालेको दर्वाह पार्क (उद्यान) तोडफोड भएको छ।

गाउँपालिकाको वडा नम्बर ५ मनपकडीमा निर्माण थालिएको पार्क तोडफोडमा नेपाली कांग्रेसका कार्यकर्तासँगै सामुदायिक विद्यालयका प्रधानाध्यापक नै संलग्न भएको गाउँपालिकाले आरोप लगाएको छ। 
सियारी गाउँपालिका–५ छपियास्थित वीरेन्द्र माविका प्रधानाध्यापक कृष्णप्रसाद चौधरी संलग्न भएको भन्दै गाउँपालिकाले उनलाई कारवाहीको माग गरेको हो।


Advertisement

शुक्रबार गाउँपालिकाका कांग्रेसका नेता शेरबहादुर काफ्ले, स्थानीय विपिन कुर्मी र प्रअ चौधरीले पूर्व योजना अनुसार नै गाउँपालिका र प्रदेश सरकारको संयुक्त लगानीमा बनाउन लागेको पार्क तोडफोड भएको गाउँपालिकाका अध्यक्ष किसुन चन्द्र चौधरीले बताए। 

गाउँपालिकाका अध्यक्ष किसुन चन्द्र चौधरीले सामुदायिक विद्यालयका प्रअले सार्वजनिक सम्पत्ति तोडफोडमा उत्रिनेलाई कडा कारवाही गरिनुपर्ने बताए। प्रअ चौधरी शुद्धोधन पाँचका स्थानीय हुन्। 


Advertisement

मसानघाट र छठ घाटका रुपमा प्रयोग भइरहेको दर्बाहमा पालिकाले बाल उद्यानसहितको पार्क बनाउन थालेको कांग्रेस कार्यकर्तासँगै केही स्थानीयले बिरोध गरेका थिए।

गाउँपालिका र प्रदेश पाँच सरकारको झण्डै दुई करोड लागतमा ऐतिहासिक तथा पुरातात्विक क्षेत्रमा गुरुयोजना अनुसार पार्क निर्माण थालिएको छ। पार्क बनाउने क्षेत्रलाई ‘कम्पाउन्ड वाल’ र त्यसमा रहेको फलामको रेलिङ र तारजाली तोडफोड  र गाउँपालिका अध्यक्ष र वडा नम्बर पाँचका वडा अध्यक्षको कार्यकक्षमा तालाबन्दी गरेका थिए। 

तर, प्रअ कृष्ण प्रसाद चौधरीले आफू तोडफोडमा संलग्न नभएको जिकिर गरे। उनले भने, ‘मलाई वार्ता टोलीमा राखिएको थियो। वार्ताका लागि सो ठाउँमा गएको हुँ तर, तोडफोडमा म संलग्न भएको होइन।’ पार्क निर्माण स्थललाई मसानघाट र छठ पूजा गर्ने स्थानको रुपमा रहेको भन्दै काफ्लेले गाउँपालिकामा साउन ७ गते पार्क नबनाउन ज्ञापनपत्र बुझाएको थियो। 

नेकपा प्रदेश ५ सांसद तुलसी प्रसाद चौधरीले काँग्रेससहित केही उदण्ड व्यक्तिहरुले पार्क तोडफोड गर्ने पूर्व सूचना प्रहरी प्रशासनलाई दिँदा समेत प्रहरी मुख दर्शक भएर बसेको आरोप लगाए। उनले सार्वजनिक सम्पतिमा विद्यालयकै प्राचार्य प्रत्यक्ष संलग्न भएको भन्दै उनलाई तत्काल कारबाही गर्न प्रशासनलाई आग्रह समेत गरे।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्