कोरोना भाइरस (कोभिड–१९) संक्रमण पछिल्लो समय अग्रपंक्तिमा काम गर्ने प्रहरीमा पनि देखिन थालेको छ ।

राजधानी काठमाडौंको ट्राफिक मुख्यालय महानगरीय ट्राफिक प्रहरी महाशाखा बग्गीखानामा लक्षणसहितका कोरोना संक्रमित देखिए ।
  
गत साउन १६ गते शुक्रवार महानगरीय ट्राफिक प्रहरी महाशाखा बग्गीखानामा २ जनामा कोरोना भाइरस संक्रमण पुष्टि भएपछि महाशाखा पूर्णरुपमा सिल गरिएको छ भने संक्रमितहरूको सशस्त्र प्रहरी कोरोना अस्पताल बलम्बुमा उपचार भइरहेको छ । 

महाशाखा सिल भएपछि सर्वसाधारणका लागि हुने काम, कारवाहीमा परेका लाइसेन्स लिने, बिलबूक लिने काम बन्द गरिएको छ । लकडाउनको समयमा बन्द गरिएको काम असार ७ गतेबाट खोलिएको थियो । 

‘महाशाखालाई सिलबन्दी गरिएपछि अहिले यहाँबाट हुने सर्वसाधारणका कामहरू बन्द छन्,’ ट्राफिक महाशाखाका प्रमुख वरिष्ठ प्रहरी उपरीक्षक (एसएसपी) भीम ढकालले लोकान्तरसँग भने । 

बग्गीखाना सिल भएपछि फिल्डमा खटिने ट्राफिक प्रहरीहरू क्वारेन्टीन छन् तर सडक ट्राफिक व्यवस्थापनमा मातहतका अन्य ट्राफिक युनिटबाट प्रहरीहरू खटाइएको एसएसपी ढकालले बताए । 

‘यहाँबाट फिल्डमा जाने ट्राफिक प्रहरीहरूको सट्टामा मातहतका ट्राफिक युनिटबाट व्यवस्थापन गरेका छौं,’ एसएसपी ढकालले भने, ‘बग्गीखानाबाट कोही पनि बाहिर निस्केर ड्युटी गरेको अवस्था छैन भने बाहिरबाट भित्र पनि आएका छैनन् ।’

महाशाखाले उपत्यकामा आवश्यक पर्ने ट्राफिक व्यवस्थापनलाई कमी हुन दिएको छैन । बग्गीखानाबाट फिल्डमा खटिने ठाउँहरू सिंहदरबारको पश्चिम गेट अगाडि, भद्रकाली, माइतीघर, पुतलीसडक, बागबजार लगायतका ठाउँमा नजिकैका ट्राफिक युनिटहरू जनसेवा, सिंहदरबार, कमलपोखरी, थापाथलीमा धेरै भएका ट्राफिक प्रहरीबाट व्यवस्थापन गराइएको एसएसपी ढकालले लोकान्तरलाई बताए । 

महाशाखाको टोलीले बिहान–बेलुका र अन्य समयमा पनि चेकिङमा जाने टोली पनि मातहतका युनिटबाट व्यवस्थापन गरिएको छ । कम चाप भएका युनिट र धेरै जनशक्ति भएका युनिटबाट जनशक्ति व्यवस्थापन गरिएको ढकालले बताए ।

सीसीटीभीबाट निगरानी

महाशाखा सिल गरिएको भए पनि क्वारेन्टीनबाटै आन्तरिक काम भने भइरहेका छन् । महाशाखा प्रमुख एसएसपी ढकालले ट्राफिक प्रहरीको मातहतमा रहेका उपत्यकाका १४५ वटा क्लोज सर्किट टेलिभिजन (सीसीटीभी) क्यामेरामार्फत उपत्यका ट्राफिकको अवस्था हेरेर निर्देशन दिइराखेका छन् ।

‘मैले र मेरो टीमले भित्रबाट हुने कामहरू गरिरहेका छौं,’ एसएसपी ढकालले भने, ‘हाम्रो मातहतमा रहेका सीसीटीभीबाट निगरानी गरेर आवश्यक निर्देशन दिइराखेका छौं ।’ उपत्यकाको ट्राफिक व्यवस्थापनको लागि भित्रबाट हुने अपरेसनल कामहरू पनि भइरहेको र सवारी चोरी नियन्त्रणको काम पनि भइरहेको प्रमुख ढकालले बताए ।

सजग रहँदै काम गर्न निर्देशन

ट्राफिक प्रहरी महाशाखाका प्रमुख एसएसपी ढकालले कोरोना भाइरसको संक्रमणबाट सजग रहेर सेवामा खटिन ट्राफिक प्रहरीलाई निर्देशन दिएका छन् । कोरोनाको संक्रमण बढ्दै गएपछि उपत्यकामा ट्राफिक व्यवस्थापन गर्ने प्रहरीलाई आवश्यक सुरक्षा अपनाएर काम निर्देशन दिएको लोकान्तरलाई बताए । ‘आवश्यक सुरक्षा सावधानी अपनाएर ट्राफिक व्यवस्थापन गर्न भनेको छु,’ एसएसपी ढकालले भने, ‘हामी उच्च मनोबलका साथ काम गरिहेका छौं ।’

काठमाडौं उपत्यकामा १ हजार ५४५ जना ट्राफिक प्रहरीले सवारीसाधनको ट्राफिक व्यवस्थापन गर्दै आएका छन् । जसमध्ये अहिले बग्गीखानामा ३०२ जना ट्राफिक प्रहरीहरू क्वारेन्टीनमा छन् र २ जना कोरोना अस्पताल बलम्बुमा उपचाररत छन् ।

महाशाखाको क्वारेन्टीनमा रहेका ट्राफिक प्रहरीको नामावली संकलन भइसकेको छ भने आगामी बुधवार कोरोना भाइरसको परीक्षणका लागि स्वाब संकलन गरिँदैछ । 

बन्दाबन्दी (लकडाउन) खुलेपछि उपत्यकामा भीडभाड बढेकाले फिल्डमा खटिने प्रहरीलाई कोरोना संक्रमणको जोखिम बढेको देखिएको छ । पछिल्लो समय प्रहरी प्रधान कार्यालय नक्सालमा ७२ जनामा कोरोना संक्रमण पुष्टि भएको छ । देशभर हालसम्म २५४ जना प्रहरीमा कोरोना संक्रमण पुष्टि भइसकेको नेपाल प्रहरीका प्रवक्ता वरिष्ठ प्रहरी उपरीक्षक (एसएसपी) कुवेर कठायतले बताए ।