क्यानडाका विभिन्न शहरमा चीनविरोधी प्रदर्शन भएका छन् । तिब्बती, हङकङवासी, भारतीय तथा इरानीहरूले चीनविरोधी प्रदर्शन गरेका हुन् । 

गत जुन महिनाको अन्त्यतिरदेखि यस्ता विरोध प्रदर्शनहरू भइरहेका हुन् । त्यतिखेर टोरन्टोमा रिजनल टिबेटन यूथ कंग्रेसले चिनियाँ वाणिज्यदूत कार्यालय नजिक विरोध प्रदर्शन गरेको थियो । त्यसपछि भ्यानकूभर र मोन्ट्रियालमा पनि विरोध प्रदर्शन भए । 

शनिवार टोरन्टोको बजार क्षेत्रमा एक जुलूस निकालिएको थियो र त्यसमा ग्लोरिया फुङ सहभागी थिइन् । उनी क्यानडा–हङकङ सम्पर्क समाजकी अध्यक्ष हुन् । उक्त संस्था १५ वटा समूहको साझा मञ्च हो जसले हङकङमा लगाइएको राष्ट्रिय सुरक्षा कानूनको विरोध गरिरहेको छ । 
 

हङकङवासीहरूले चीनविरुद्ध विगत दुई वर्षदेखि विरोध गरिरहेका छन् र पोहोर साल अगस्ट महिनामा ठूलै र्‍याली निकालेका थिए । 

तिब्बती आप्रवासीहरूले पनि कोभिड–१९ महामारीको सन्दर्भमा संसारको ध्यान चीनमा परिरहेको बेलामा त्यसबाट फाइदा उठाउन सकिने सोच बनाएर विरोध प्रदर्शन गरिरहेका छन् । 

ताइवान र भियतनाम मूलका क्यानडावासीहरूले पनि चीनविरुद्ध प्रदर्शन गरिरहेका छन् । इरानबाट भागेर आएका सलमान सिनाले उइगुर, तिब्बती र हङकङवासीहरूको मानवअधिकार उल्लंघन भइरहेकाले ऐक्यबद्धता जनाउन आफूहरू विरोध प्रदर्शनमा आएको बताए ।