कोरोनाभाइरस महामारी र राजनीतिक तनावका कारण अमेरिकामा अड्केका चिनियाँ विद्यार्थीहरू दुवै देशका विषयमा नयाँ सोच बनाइरहेका छन् । 

आठ वर्षअघि शिझेङ तिए १३ वर्षकी हुँदा चीनबाट उच्चशिक्षाका लागि ओहायो पुगेकी थिइन् । उनले अमेरिकन ड्रीम साँचिरहेकी थिइन् तर अहिले अमेरिकामा शत्रुतापूर्ण व्यवहार खेपिरहेकी छन् । 

‘अमेरिकामा बस्ने चिनियाँ भएको हैसियतले म अहिले निकै त्रस्त छु,’ उनी भन्छिन् । तिए अहिले जोन्स हप्किन्स विश्वविद्यालयमा अध्ययन गरिरहेकी छन् । अमेरिका चीनविरोधी र अस्तव्यस्त भएको उनको भनाइ छ । 

अमेरिकाका विभिन्न विश्वविद्यालय तथा क्याम्पसमा लगभग तीन लाख ६० हजार चिनियाँ विद्यार्थीहरू भर्ना भएका छन् । 

विगत केही महिनायता उनीहरूले दुईवटा ऐतिहासिक घटना बेहोर्नुपरेको छ ः विश्वव्यापी महामारी अनि अमेरिका र चीनबीच अभूतपूर्व तनाव । 

अमेरिकामा रहेका अधिकांश चिनियाँ विद्यार्थीहरू पूरा पैसा तिर्ने गर्छन् । पश्चिमी शिक्षाले आफूहरूलाई राम्रो करीयर दिलाउने अपेक्षा उनीहरूको छ । 

तर वाशिङटनले चीनबाट आएका सबै विद्यार्थी सामान्य नभएको बताउँदै आएको छ । तीमध्ये केही बेइजिङको एजेन्ट भएको र आर्थिक जासूसी, चीनपरस्त धारणाको प्रचार तथा अमेरिकाका क्याम्पसहरूमा अन्य चिनियाँ विद्यार्थीको निगरानीमा लागेको दाबी गरिएको छ । 

ट्रम्प प्रशासनले चिनियाँ सेनासँग सम्बन्ध भएको मानिएका तीन हजार विद्यार्थीको प्रवेशाज्ञा हालैका दिनमा रद्द गरेको छ । एक सिनेटरले त चिनियाँहरूलाई अमेरिकामा आएर गणित र विज्ञान पढ्न दिन पनि नहुने बताएका थिए ।  

यस्तो कठोर अभिव्यक्तिहरू आइरहँदा चिनियाँ विद्यार्थीले आफूलाई वाशिङटनको राजनीतिक तारो बनाइएको अनुभूति गरेका छन् । 
 

तिएले वातावरण विज्ञान अध्ययन गरिरहेकी छन् र उनी अमेरिकामा प्राज्ञिक भविष्यका बारेमा आफू निराश भएको बताउँछिन् किनकि विज्ञान तथा प्रविधिमा चिनियाँ विद्यार्थी र विद्वानहरूमाथिको निगरानी बढिरहेको छ । 
‘

म अमेरिकामा विद्यावारिधि गर्छु र यतै घरजम गर्छु भन्ने सोच लिएर आएकी थिएँ तर स्नातकोत्तर गरेपछि म चीन फर्किने सम्भावना देखिरहेकी छु,’ तिएले भनिन् । 
 

साइराक्युज विश्वविद्यालयमा समाजशास्त्रकी सहप्राध्यापक यिङयी माले अमेरिकामा चिनियाँ विद्यार्थीहरू अभूतपूर्व स्तरमा राजनीतिकरण तथा सीमान्तीकरणमा परेको बताइन् । वाशिङटनले एकदमै शत्रुतापूर्ण संकेत दिइरहेको उनको भनाइ छ । 

चीन र अमेरिकाबीचको सम्बन्ध बिग्रँदा जनस्तरमा समेत असर परेको छ । हालै गरिएको एक सर्वेक्षणले ७३ प्रतिशत अमेरिकी वयस्कहरूमा चीनप्रति नकारात्मक धारणा रहेको पाइयो जुन ऐतिहासिक रूपमै उच्च हो । 

‘अमेरिका हामीलाई निकाल्न चाहन्छ, चीन हामीलाई फर्कन दिँदैन, घरको न घाटको भइयो,’ तिए भन्छिन् । 

अमेरिकामा पढिरहेका अन्य चिनियाँ विद्यार्थीको सोच पनि यस्तै किसिमको छ । 

बीबीसीबाट