स्पेनका पूर्वराजा हुआँ कार्लोसले देश छोड्ने निर्णय लिएको त्यहाँको राजदरबारले जनाएको छ । उनीविरुद्ध भ्रष्टाचारको आरोपमा छानबिन गरिने भएपछि उनी स्पेनबाट निस्कने भएका हुन् । 

८२ वर्षीय कार्लोसले आफ्ना छोरा फेलिपेलाई पत्र लेखेर देश छोड्ने घोषणा गरेका हुन् । कार्लोसले ६ वर्षअघि छोरालाई गद्दी सुम्पेका थिए । 
 

अभियोजनकर्ताहरूले अन्तर्वार्ता लिन चाहेमा आफू उपलब्ध हुने उनले बताए । 

जुन महिनामा स्पेनको सर्वोच्च अदालतले साउदी अरबमा द्रुत गतिको रेलमार्ग निर्माण सम्झौतामा भएको भ्रष्टाचारमा हुआँ कार्लोस संलग्न रहेको विषयमा अनुसन्धान शुरू गरेको थियो । 

पूर्वराजा कुन ठाउँमा बस्नेछन् भन्ने कुरा स्पष्ट भइसकेको छैन तर स्पेनी मिडियाले चाहिँ उनी देश छोडेर गइसकेको भनी लेखेका छन् । 

सन् १९७५ मा तानाशाह जनरल फ्रांकोको मृत्युपछि स्पेनलाई निरंकुश शासनबाट लोकतन्त्रको बाटोमा डोहोर्‍याउन योगदान गरेका राजाको यसरी बेइज्जतीपूर्ण बहिर्गमन दुर्भाग्यपूर्ण भएको बताइएको छ । 
 

हुआँ कार्लोसले लगभग ४० वर्ष राजगद्दी सम्हालेपछि सन् २०१४ मा त्यागेका थिए । त्यतिखेर उनका छोरीज्वाईं भ्रष्टाचार काण्डमा संलग्न रहेको भनी अनुसन्धान गरिएको थियो अनि स्पेनमा आर्थिक संकट परेको बेलामा राजा हात्तीको शिकार गर्न गएको विषय विवादमा परेको थियो । 
 

स्पेनी कम्पनीहरूले मक्काबाट मदिनासम्म द्रुत गतिको रेलमार्ग निर्माणको ठेक्का जितेकोमा भएको भ्रष्टाचारमा पूर्वराजाको पनि संलग्नता रहेको भन्ने चाहिँ अहिलेको विवाद हो । 

बीबीसीबाट