अमेरिकाले अहिले तनाव चलिरहेको बेलामा चिनियाँ पत्रकारहरूलाई निकालेछ भने चीनले बदला लिनका लागि योजना बनाइरहेको चिनियाँ पत्रिका ग्लोबल टाइम्सका सम्पादक हु सिजिनले बताएका छन् । 

हङकङमा रहेका अमेरिकी पत्रकारहरूलाई निकालेर प्रतिशोध लिने उनले मंगलवार बताए । 

‘मैले थाहा पाएसम्म अमेरिकी पक्षले चिनियाँ पत्रकारहरूको प्रवेशाज्ञा नवीकरण गरेको छैन । अमेरिकामा रहेका सबै चिनियाँ पत्रकारहरू निस्कन पर्ने खराब परिस्थिति आउन सक्छ । त्यसो भयो भने चिनियाँ पक्षले प्रतिकार गर्छ,

हङकङमा रहेका अमेरिकी पत्रकारलाई समेत तारो बनाउन सकिन्छ,’ हुले ट्विटरमा लेखे । 

चीनको परराष्ट्र मन्त्रालयले मार्च महिनामा अमेरिकाका प्रमुख पत्रिका न्युयोर्क टाइम्स, वाल स्ट्रीट जर्नल र वाशिङटन पोस्टका पत्रकारलाई प्रेस कार्ड बुझाउन भनेको थियो । अमेरिकाले आफ्नो भूमिमा चिनियाँ पत्रकारको संख्या घटाउन खोजेपछि चीनले यस्तो कदम चालेको थियो । 

फेब्रुअरी महिनामा वाशिङटनले विभिन्न चिनियाँ सरकारी मिडियालाई फरेन मिसनको दर्जा दिएको थियो जसकारण लगभग ६० जना चिनियाँ संवाददाता निस्कन बाध्य भएका थिए । वाशिङटनले देशका मिडियालाई आफ्ना सबै कर्मचारीको बारेमा अनि तिनको घरजग्गाका बारेमा जानकारी परराष्ट्र मन्त्रालयलाई खबर गर्नुपर्ने बताएको थियो ।