उत्तर कोरियाले आफ्ना ब्यालिस्टिक क्षेप्यास्त्रहरूमा फिट हुने साना आणविक वारहेडहरू विकसित गरिसकेको हुनसक्ने संयुक्त राष्ट्रसंघको एक प्रतिवेदनले चेतावनी दिएको छ । 

विभिन्न देशका सुरक्षा सेवाहरूले राष्ट्रसंघको सुरक्षा परिषद्लाई उत्तर कोरिया प्राविधिक अवरोधलाई पन्छाउन सफल भइसकेको हुनसक्ने बताएका छन् । लामो दूरीको आणविक हतियार विकसित गर्नेतर्फको यो एक महत्त्वपूर्ण चरण हो । 

किम जोङ उन र डोनल्ड ट्रम्पबीच आणविक परिक्षण रोक्ने सम्झौता भए पनि उत्तर कोरियाले आणविक क्षमता बढाइरहेको ती देशहरूले बताएका छन् । 

उत्तर कोरियाले सन् २०१७ पछि आणविक डिभाइस वा लामो दूरीको क्षेप्यास्त्र परीक्षण गरेको छैन । त्यतिखेर उसले आणविक बमको दौड अन्त्य भएको घोषणा गरेको थियो तर अन्तर्राष्ट्रिय समुदायले पत्याएको थिएन । 

त्यही वर्ष किमले ह्वासोङ–१५ नामक अन्तर्महादेशीय ब्यालिस्टिक क्षेप्यास्त्र प्रक्षेपणको निरीक्षण पनि गरेका थिए । त्यो क्षेप्यास्त्र अमेरिकी मुख्यभूमिसम्म पुग्छ । 

उत्तरले आफ्नो भूमिगत परीक्षण स्थलबाट थर्मोन्युक्लीयर बम पनि परीक्षण गरिसकेको विश्वास गरिन्छ । त्यो अत्यन्त शक्तिशाली भएकाले त्यसभन्दा माथिको पहाड अलिकति धस्किएको थियो । 

त्यतिखेर विज्ञहरूले बमलाई सानो बनाउने प्रविधि मात्र किमलाई आवश्यक रहेको भनी चेतावनी दिएका थिए । त्यसपछि उनले अमेरिकालाई समेत जोखिममा पार्ने गरी लक्ष्यमै पुग्ने हतियार विकसित गर्ने उनीहरूले बताएका थिए ।

संयुक्त राष्ट्रसंघसमक्ष बुझाइएको अन्तरिम प्रतिवेदन रोयटर्स समाचार संस्थाले हेरेको छ । सोमवार उक्त प्रतिवेदन सुरक्षा परिषद्को उत्तर कोरिया प्रतिबन्ध समितिसमक्ष बुझाइएको हो ।