कोरोनाबाट पछिल्लो २४ घण्टामा ५ जनाको मृत्यु, थपिए ३ सय ६० संक्रमित

सरकारले भन्यो– 'संक्रमण बढेकाले अप्ठ्यारो स्थिति सिर्जना भयो'

स्वास्थ्य तथा जनसंख्या मन्त्रालयले पछिल्लो २४ घण्टामा कोरोनाका कारण ५ जनाले मृत्युवरण गरेको जनाएको छ ।

बिहीवार नियमित प्रेस ब्रिफिङका क्रममा मन्त्रालयका प्रवक्ता डा. जागेश्वर गौतमले ५ जनाको मृत्यु भएको जानकारी दिए । यससँगै नेपालमा कोरोनाका कारण मृत्यु हुनेको संख्या ६५ पुगेको छ । 


Advertisement

डा. गौतमका अनुसार मृत्यु हुनेमा मोरङका २ जना रहेका छन् । दुवै ४५ वर्षका रहेको प्रवक्ता डा. गौतमले बताए । 

सर्लाही मलंगवाकी ६५ वर्षीया महिला, धनुषाकी ७२ वर्षीया महिला र सप्तरीका ४२ वर्षका पुरुषको कोरोनाका कारण मृत्यु भएको छ ।


Advertisement

पत्रकार सम्मेलनमा दिइएको जानकारीअनुसार पछिल्लो २४ घण्टामा देशैभर थप ३ सय ६० जनामा संक्रमण देखिएको छ । 

यससँगै नेपालमा कोरोना संक्रमितको कुल संख्या २१ हजार ७५० पुगेको छ । सक्रिय संक्रमितको संख्या भने ६ हजार २ सय ९६ रहेको छ ।

प्रवक्ता डा. गौतमका अनुसार पछिल्लो २४ घण्टामा काठमाडौं जिल्लामा ७६, भक्तपुरमा १ र ललितपुरमा १० जनामा संक्रमण देखिएको छ । 

पछिल्ला केही दिनमा संक्रमणको दर बढेको छ । उपत्यका काठमाडौंमा पनि संक्रमणको दर विस्तार भएको छ । 

पछिल्लो २४ घण्टामा २ सय ३३ जना संक्रमणमुक्त भएर डिस्चार्ज भएका छन् ।

डिस्चार्ज हुनेको कुल संख्या १५ हजार ३८९ छ ।

स्थिति जटिल

स्वास्थ्य मन्त्रालयले कोरोना संक्रमणको दर बढेकाले देशैभर अप्ठेरो परिस्थिति सिर्जना भएको जनाएको छ ।

बिहीवार नियमित प्रेस ब्रिफिङका क्रममा मन्त्रालयका प्रवक्ता डा. जागेश्वर गौतमले कोरोना संक्रमणको दर देशैभर फैलिएकाले सबैलाई सावधानी अपनाउन अपिल गरे । 

उनले कुनै पनि सरकारी वा निजी कार्यालयमा बैठक, गोष्ठी र सेमिनार नगर्न अपिल गरेका छन् । 

'सरकारी तथा निजी कार्यालयमा बैठक, गोष्ठी र सेमिनार बन्द गर्न र यदि बैठक गर्नै परेमा भर्चुअल्ली गर्न अपिल गर्दछौं,' डा. गौतमले भने, 'भारतीय सीमा क्षेत्रका जिल्लामा संक्रमणको दर उच्च रहेकाले स्थानीय पालिका, प्रदेश सरकारले जनस्वास्थ्यका मापदण्ड अपनाउन र अनुगमन गर्न अपिल गरेका छौं ।'

उनले स्वाब संकलन गरेपछि रिपोर्ट नआउने बेलासम्म अनिवार्य क्वारेन्टीनमा बस्नुपर्ने बताए । 

डा. गौतमले कोरोना संक्रमण वृद्धि भएकाले अस्पतालका बेड र चिकित्सकहरू कम हुनसक्ने चिन्ता व्यक्त गरे ।

त्यसको उचित व्यवस्थापन गर्न सरकारी तथा निजी अस्पतालहरूलाई आग्रहसमेत गरे । 

उनले अस्पतालका कर्मचारीले सिफ्टमा काम गर्ने व्यवस्था मिलाउने र अनिवार्यरूपमा जनस्वास्थ्य मापदण्ड अपनाउनुपर्ने समेत बताए । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्