रुपन्देहीमा राष्ट्रिय परिचय पत्रको लागि तथ्यांक संकलनको काम बिहीवारबाट शुरू भएको छ ।

जिल्ला प्रशासन कार्यालय रुपन्देहीमा स्थापना गरिएको तथ्यांक संकलन केन्द्रमा सिद्धार्थनगर नगरपालिकाका प्रमुख हरिप्रसाद अधिकारीको व्यक्तिगत विवरण संकलन गरी कार्यक्रमको थालनी गरिएको छ ।

तथ्यांक संकलनका लागि मेयर अधिकारीको कम्युटरबाट फोटो खिच्ने, औंठासँगै सबै हातका औलाको स्क्रिनिङ्ग गर्ने, डिजिटल सिग्नेचर गर्ने, आँखाको रेटिना स्क्रिनिङ्ग गर्ने जस्ता प्रक्रिया पूरा गरी उनको व्यक्तिगत विवरण राष्ट्रिय तथ्यांक संकलन डाटामा समावेश गरिएको प्रमुख जिल्ला अधिकारी माहादेव पन्थले बताए । 

सरकारले नागरिकलाई दिने सुविधामा एकद्वार प्रणाली अपनाउन र व्यक्तिको सम्पूर्ण परिचय दिने एउटै परिचयपत्र बोकर हिँड्नसमेत सहज हुने प्रजिअ पन्थले बताए । बिहीवारबाट शुरू गरिएको काम अब दैनिक रुपमा सञ्चालन हुनेछ । छिटोभन्दा छिटो नागरिकको तथ्यांक संकलन गरी परिचयपत्र वितरण गर्ने उद्देश्यका साथ अन्य स्थानमा समेत संकलन केन्द्र थप गरी काम गर्ने प्रजिअ पन्थले जानकारी दिए । 

व्यक्तिगत विवरण संकलन गराउन आउने नागरिकले आफ्नो नागरिकता, विवाहितको हकमा विवाह दर्ता लगायतका कागजपत्र समावेश गर्नुपर्ने छ । जनतालाई प्रदान गर्ने सेवा सुविधा एकीकृत प्रणालीमार्फत एउटै परिचयपत्रबाट प्राप्त हुने प्रावधान सहितको प्रणालीको विकास गर्ने, जैविक पहिचानसहितको बहुउपयोगी परिचयपत्र तयार गरी वितरण गर्ने र नेपालमा बस्ने सबै व्यक्तिका विवरण राष्ट्रिय तथ्यांक भण्डारणमा समाविष्ट गर्ने राष्ट्रिय परिचय पत्रको उद्देश्य रहेको प्रजिअ पन्थले बताए ।  

राष्ट्रिय परिचय पत्रलाई नागरिकता र अन्य परिचयपत्र सबैलाई विस्थापन गर्ने गरी प्रयोगमा ल्याइने सरकारको योजना रहेको उनले सुनाए । यसो गर्दा नागरिकलाई सेवा लिन सहज हुने र कुनै अपराध वा घटनामा संलग्न व्यक्तिको विवरण तुरुन्त निकाल्न सकिने हुँदा अपराधमा समेत कमी आउने प्रजिअ पन्थले बताए ।