नेपाल घुम्न आएका विदेशी पर्यटकले नेपाली खानाको थाली बनाउन एक दिनको तालिम लिएका छन् । पोखराको चिप्लेढुङ्गास्थित कान्तिपुर होटल ट्रेनिङ इन्टिच्युटबाट विदेशी पर्यटकले नेपाली खानाको थाली बनाउन सिकेको होटल सञ्चालक विजय पौडेलले जानकारी दिए ।

‘उहाँहरु विभिन्न देशका नागरिक हुनुहुन्छ, बन्दाबन्दीले नेपालभित्रै रहनुपरेपछि एकअर्काबीच साथी भएर ग्रुप बनाउनुभएको रहेछ, एकदिन हामीलाई नेपाली खाना बनाउने तालिम दिनुस् भनेर आउनुभयो, हामीले १० जनाको टोलीलाई तालिम दियौँ,’ पौडेलले भने, ‘उक्त टोलीमा अष्ट्रेलिया, न्यूजिल्याण्ड, बेलायत, फ्रान्सलगायत देशका नागरिक रहेका छन् ।’

फ्रान्सका नागरिक माइकलले नेपाली खाना निकै स्वादिष्ट लागेको र पकाउँदा पनि निकै रमाइलो लागेको प्रतिक्रिया दिए । उनले अहिले लेकसाइडबाट थाइ मसाजको तालिम लिइरहेको बताए । आफ्ना केही साथी पोखरा आसपासका पदयात्रामा गएकाले उनीहरु फर्केपछि साथीलाई पनि नेपाली खानाका थाली बनाउन तालीममा सहभागी गराउने उनको भनाइ थियो ।

प्रशिक्षकद्वय निश्चल देवकोटा र विजय सुवेदीले पर्यटकलाई नेपाली खाना बनाउन सिकाएका थिए । ‘निकै मेहनत र रुचिपूर्वक तालिममा सहभागी हुनुभयो छोटो समयमा पनि मीठो नेपाली खाना बनाउन उहाँहरु सफल हुनुभयो,’ प्रशिक्षक देवकोटाले भने ।

पर्यटकले आफूले बनाएको नेपाली खाना सबैजना मिलेर खाएको अर्का प्रशिक्षक सुवेदीको भनाइ थियो । उनले भने, ‘हामीले एकदिन तालिममा दाल भात तरकारी, अचारलगायतको आइटम बनाउन सिकाएका थियौँ, निकै रुचिपूर्वक सिक्नुभयो ।’

सुवेदीका अनुसार उनीहरुले बिहान ९ बजेदेखि दिउँसोको समयमा दालभात तरकारी अचारका आइटम बनाउन सिकेको थिए । कान्तिपुर होटल टे«निङ इष्टिच्युटले २०६३ सालदेखि सञ्चालनमा आएयता करिब २६ हजारलाई कुक तालिम दिइसकेको छ ।

तालिम लिएका ६० प्रतिशत विदेशका विभिन्न होटल तथा तारे होटलमा कार्यरत छन् भने ४० प्रतिशत नेपालभित्रै रोजगार र स्वरोजगार रहेको सञ्चालक पौडेलले जानकारी दिए ।