अविरल वर्षाले सोमवार सुदूरपश्चिम प्रदेशसभा भवन रहेको क्षेत्र जलमग्न भएको छ तर सुदूरपश्चिम प्रदेशको राजधानी रहेको धनगढी जलमग्न हुनु नौलो होइन ।

हिउँदको सामान्य झरीले पनि जलमग्न हुन्छ धनगढी तर प्रदेश सरकार र स्थानीय सरकारले समस्याको समाधान अझै निकालेका छैनन् ।

खोलानाला अतिक्रमण, पानी निकासको उचित व्यवस्थापन नहुँदा धनगढी बजार डुबानमा पर्दै आएको हो । रातभरिको वर्षातले सोमवार धनगढी उपमहानगरपालिकाका अधिकांश क्षेत्र जलमग्न भएका छन् ।

धनगढीमा सबैभन्दा बढी एलएन चोक, पार्क चोक तथा प्रदेशसभा आसपास, विशालनगर, मिलनचोक, चौराहा, उत्तरबेहरी, धनगढी गाउँ, शिवनगर लगायतका अधिकांश क्षेत्र जलमग्न भएका छन् । वडा नम्बर ३ का दर्जनभन्दा बढी घर तथा पसल डुबानमा परेका छन् । 

पानी निकास हुने गरेका पुराना खोल्सा, कुलेसामा घर निर्माण हुने क्रममा पुरिएपछि स्थानीयका घर तथा पसलभित्र पानी पस्नुका साथै मुख्य सडक समेत जलमग्न भएको धनगढी उपमहानगरपालिका–७ का शारदा रानाले बताए ।

वर्षाले स्थानीयका धानबाली डुबानमा परेका छन् भने खेतबारी जलमग्न भई तलाउजस्तै देखिएका छन् । धनगढीमा निर्माणाधीन अवस्थामा रहेको ६ लेन सडक र अर्कोतिर रिङरोड निर्माणसँगै पानीको उचित निकासको व्यवस्थापन हुन नसकेका कारण डुबानको समस्या निम्तिएको धनगढी उपमहानगरपालिका–७ का मोहन कोराल बताउँछन् ।

सघन शहरी विकास आयोजना अन्तर्गत सडक निर्माण हुँदा उचित ढल निकासको व्यवस्थापन नगरिँदा डुबानको समस्या बिकराल बन्दै आएको कोरालको भनाइ छ ।

उपमहानगरभित्र भएका प्राकृतिक खोला नाला अतिक्रमण भएपछि डुबान समस्या बर्सेनि दोहोरिने गरेको छ । धनगढीको कैलाली नाला, सुकुटी नाला सबैभन्दा अतिक्रमणको चपेटामा परेका छन् । जुनकारण जुनसुकै मौसममा आउने केही क्षणको झरीले जलमग्न हुँदै आएको छ । 

जिल्ला प्रहरी कार्यालय कैलालीका प्रहरी निरीक्षक हिक्मत थापाका अनुसार धनगढी उपमहानगरपालिकाको वडा नम्बर १, २, ३, ४, ५, ८ लगायत क्षेत्र डुबानमा परेको छ । जसबाट करीब २५० घरमा पानी पसेको भए पनि क्षति भने नभएको प्रहरी निरीक्षक थापाले बताए । यद्यपि जिल्लाका अन्य क्षेत्रको अवस्था सामान्य रहेको प्रहरीले जनाएको छ ।