बुटवलको चारपाला सामुदायिक वन अतिक्रमणको चपेटामा परेको छ ।

केही भूमाफियाले वनको ब्लक नम्बर २ अन्तर्गत बस्ती क्षेत्र (रम्भादेवी कलेज) नजिकै वनको जग्गा अतिक्रमणको चलखेल गरेका छन् । 

चारपाला सामुदायिक वन उपभोक्ता समूहका अध्यक्ष ओमप्रकाश ठाकुरले केही महिनाअघि वनको साधारणसभा गर्दाको दिन मौका छोपेर भूमाफियाले वनको झण्डै १५ कठ्ठा जग्गामा डोजर प्रयोग गरी सम्याएको बताए । तर आफूहरूले प्रमाण पेश गर्न भनेपछि प्रमाण पुर्‍याउन नसकेर पछाडि हटेको बताए । 

तर पछिल्लो समय प्रमाण जुटाउन नसकेपछि पनि पछाडि नहटी थप सक्रिय छन् । वनले अहिले जग्गालाई पर्खाल लगाउने योजना अगाडि सारेको छ । तर बजेट अभाव भएपछि त्यो कार्य अगाडि बढ्न सकेको छैन । 

वनको जग्गा अतिक्रमणमा बुटवलका राजनीतिक दलका नेताहरू नै संलग्न रहेको वनको आरोप छ । चारपाला वन बुटवलको पायक पर्ने वन हो । अतिक्रमित क्षेत्रलाई पर्खाल लगाउन स्थानीय तह बुटवल उपमहानगरपालिकाले खासै चासो दिएको छैन । यो वनले बुटवलको हरियाली र पर्यावरण सन्तुलनमा ठूलो महत्त्व राखेको छ । अतिक्रमित क्षेत्रमा पर्खाल लगाउन कम्तीमा १५ लाख रुपैयाँ बजेट आवश्यक पर्ने वनको अनुमान छ ।

पछिल्लो समय विभिन्न जातजातिका भवन, भाषाभाषीका भवन, मठमन्दिर र पाटीपौवाका नाम सामुदायिक वनहरू अतिक्रमण हुँदै गएका छन् । सार्वजनिक सम्पत्ति संरक्षण गर्ने दायित्व भएका स्थानीय सरकारले त्यसतर्फ ध्यान दिन सकिरहेका छैनन् ।  

चारापाला वन २ हजार हेक्टर क्षेत्रफलमा फैलिएको छ । यो नेपालकै ठूलो वन अन्तर्गत पर्छ । यो वन बुटवल उपमहानगरपालिका, शुद्धोधन गाउँपालिका र सियारी गाउँपालिकामा गरी ३ स्थानीय तहसम्म फैलिएको छ । शुद्धोधन र सियारी गाउँपालिकाले वनको उपयोग गरे पनि वन संरक्षणमा कुनै योगदान गरेका छैनन् ।

बुटवल उपमहानगरपालिका–१२ का वडा अध्यक्ष दूर्गा सुवेदीले वन संरक्षण गर्नबाट आफूहरू पछाडि नहटेको दाबी गरे । उनले भने, ‘वन क्षेत्र अतिक्रमणको चपेटामा परेको भन्ने सुनेको छु । वनले नगरसँग समन्वय गरेर अगाडि बढेमा वन संरक्षण गर्न बुटवल उपमहानगरपालिका तयार छ । बजेट अभावले पर्खाल लगाउन नसकिएकै हो भने सहयोग गर्न पनि उपमहानगर र वडा तयार छ ।’

वनमा दुर्लभ वन्यजन्तु समेत पाइन्छ । यहाँ विश्वकै दुर्लभ पहेलो कछुवा पनि भेटिएको छ । बाघ, भालु चितुवा, बदेल, हरिण लगायतका जंगली जनावर वनमा छन् । अतिक्रमण जंगली जनावरको बासस्थान समेत संकटमा पर्दै गएको छ ।