स्वास्थ्य तथा जनसंख्या मन्त्रालयले कोभिड १९ का कारण पछिल्लो २४ घण्टामा थप ४ जनाको मृत्यु भएको जनाएको छ ।

सोमवार नियमित मिडिया ब्रिफिङका क्रममा मन्त्रालयका प्रवक्ता डा. जागेश्वर गौतमले कोरोनाका कारण ४ जनाको मृत्यु भएको र हालसम्म मृतकको संख्या ७९ पुगेको बताएका हुन् ।

मृत्यु हुनेमा २ महिला र २ पुरुष छन् ।

डा. गौतमले बाँकेको कोहलपुर बस्ने ७० वर्षीया महिला, पर्सा जिल्लाकी ४५ वर्षीया महिला, काठमाडौँ महानगरपालिका वडा नम्बर १० बस्ने ७६ वर्षीय पुरुष र किर्तिपुर नगरपालिका बस्ने ६४ वर्षीय पुरुषको मृत्यु भएको बताए ।

यससँगै नेपालमा कोरोनाका कारण मृत्यु हुनेको संख्या ७९ पुगेको छ ।