साउदी अरबले पाकिस्तानप्रतिको नीति परिवर्तन गरेको देखिएको छ । 

गत साता पाकिस्तानलाई साउदीले एक अर्ब अमेरिकी डलर फिर्ता गर्न ताकेता गरेपछि यी दुई मुलुकको सम्बन्धमा चिसोपन देखिएको हो । 

मे महिनादेखि पाकिस्तानले साउदी अरबबाट पछि पैसा तिनेै गरी तेल पनि पाइरहेको छैन । यी दुई देशले ३.२ अर्ब डलर बराबरको इन्धन खरिदका लागि गरेको सम्झौताको म्याद दुई महिनाअघि सकिएपछि साउदीले तेल रोकेको हो । 

पाकिस्तानले साउदीलाई कश्मीरका विषयमा इस्लामिक दुनियामा आवाज उठाउन अनुमति दिन भनेको छ । गत फेब्रुअरी महिनामा उसले अर्गनाइजेसन अफ इस्लामिक कोअपरेसनको बैठक बोलाउन आह्वान गरेको थियो तर साउदी अरबले मानेन । ओआईसी ५७ मुसलमान देशहरूको समूह हो जसमा साउदी अरबको ठूलो प्रभाव छ । 

पाकिस्तानका परराष्ट्रमन्त्री शाह मेहमूद कुरैशीले भारतबाट कश्मीरको विशेषाधिकार हरण भएलगत्तै कश्मीरका विषयमा ओआईसी काउन्सिलको बैठकको माग गरेका थिए । 

साउदी अरबले यो प्रस्ताव अस्वीकार गरेपछि पाकिस्तानका प्रधानमन्त्री इमरान खान निकै रिसाएका थिए । 

पाकिस्तानले साउदीबाट पाएको एक अर्ब डलर ऋण तिर्नुपर्ने समयभन्दा चार महिनाअगावै फर्काइसकेको छ । चीनबाट पैसा आएमा उसले साउदीको बाँकी २ अर्ब डलर ऋण पनि फिर्ता गर्ने कुरा छ । 

साउदीको बफादार मुलुक यूएईले पाकिस्तानलाई सन् २०१८ को डिसेम्बर महिनामा ६.२ अर्ब डलरको प्याकेज समेत घोषणा गरेको थियो । तर पछि यूएईले यो सहयोग २ अर्ब डलरमा झारेको छ र पछि तिर्न मिल्ने गरी ३.२ अर्ब डलरको तेल दिने योजना पनि रद्द गरेको छ । 

यसैबीच चीन र इरानले रणनीतिक सम्झौता गरेकाले चीनको बफादार मुलुक पाकिस्तानले साउदी अरबको क्षेत्रीय दुश्मन इरानसँग नजिकिने छाँट देखाएको छ ।