लगानी बोर्डका प्रमुख कार्यकारी अधिकृत (सीईओ) सुशील भट्टलाई सीईओको रूपमा काम गर्न उच्च अदालत पाटनले रोक लगाएको छ ।

मुख्य न्यायाधीश नहकुल सुवेदीको एकल इजलासले अर्को आदेश नहुँदासम्मका लागि सीईओको हैसियतमा भट्टलाई कुनै पनि काम गर्न नदिनू भन्ने अन्तरिम आदेश जारी गरेको हो ।

अधिवक्ता जयबहादुर भुजेलले दायर गरेको रिटमा सुनुवाइ गर्दै मुख्य न्यायाधीश सुवेदीको इजलासले सरकारका नाममा कारण देखाऊ आदेश जारी पनि गरेको छ ।

भट्टलाई सीईओ नियुक्त गर्नुपर्नाको कारणसहितको लिखित जवाफ १५ दिनभित्र पेश गर्न भनिएको छ ।

यस मुद्दामा अर्को सुनुवाइ यही साउन ३२ गते हुने गरी तोकिएको छ ।

सुनुवाइका क्रममा आवश्यक परे एमिकस क्युरी पनि बोलाउन सकिने आदेश भएको उच्च अदालत पाटनका रजिस्ट्रार बाबुराम दाहालले लोकान्तरलाई जानकारी दिए ।

साउन १९ गतेको मन्त्रिपरिषद् बैठकले भट्टलाई लगानी बोर्डको सीईओमा नियुक्त गर्ने निर्णय गरेको थियो ।

​ सीईओका लागि भट्टको योग्यता नपुग्ने तथा विभिन्न ठेक्कामा कालोसूचीमा परेको दाबी गर्दै अधिवक्ता भुजेलले उच्च अदालतमा रिट दायर गरेका थिए।