कर्णाली सरकारको उपलब्धी - एक वर्षमा १ किलोमिटर ८२० मिटर सडक कालोपत्रे

शेरबहादुर थापा
शेरबहादुर थापा

लोकान्तर संवाददाता थापा कर्णाली प्रदेशबाट रिपोर्टिङ गर्छन् ।

फाइल तस्वीर

कर्णाली प्रदेशका मुख्यमन्त्री महेन्द्रबहादुर शाहीले गत आर्थिक वर्षमा नयाँ जनशक्ति खटाउन भएको पहिलो चौमासिकको ढिलाइले अपेक्षित बजेट खर्च गर्न नसकेको स्वीकार गरेका छन् ।

मंगलवार वीरेन्द्रनगरमा गत वर्षको वार्षिक प्रगति विवरण सुनाउँदै मुख्यमन्त्री शाहीले सो कुरा बताएका हुन् ।


Advertisement

‘हामीले ८० देखि ८५ प्रतिशत भौतिक र वित्तीय प्रगति गर्ने योजना बनाएका थियौं । तर हामी उक्त लक्ष्यमा पुग्न सकेनौं । ५४ प्रतिशत भौतिक प्रगति र ४८ प्रतिशत वित्तीय प्रगति मात्रै गर्न सक्यौं । पहिलो चौमासिक शून्यमा थियो । दोश्रो र तेश्रो चौमासिकमा काम गर्न प्रयास गर्दा गर्दै पनि लकडाउनका कारण हामीले काम भनेजस्तो गर्न सकेनौं,’ उनले भने ।

उनले तेश्रो चौमासिकमा कडा लकडाउन लगाएको, डोजरमार्फत काम गर्न खोज्दा सिडिओहरुले डोजर नै नियन्त्रणमा लिएको, काम गर्न संघीय सरकारले असहयोग गरेको, संघीय सरकारका कर्मचारीले हामीले भनेको नमानेको लगायतका कारण विकासको काममा वाधा पुगेको फेहरिस्त सुनाए ।


Advertisement

उनले चालू आर्थिक वर्षमा कर्णाली सरकारलाई काम गर्ने कुनै पनि बहाना बाँकी नरहेको बताए ।

‘हावा आओस या हुरी आओस या कोभिड नै आओस । हामीले आत्मसमीक्षा गर्दै काम गर्नुको विकल्प छैन । हामी शतप्रतिशत काम गर्छौं । त्यसकालागि मन्त्रीसँग मैले, सचिवसँग मन्त्रीले र सचिवले दशै जिल्लाका कार्यालय प्रमुखसँग कार्यसम्पादन करार सम्झौता अवको १५ दिनमा भइसक्नेछ,’ मुख्यमन्त्री शाहीले भने ।

हरेक महिनाको, हरेक दिनको हिसाब सफ्टवेयरमा हुने र हरेक महिनामा अहिले भएको सम्झौता अनुसार काम नभएको खण्डमा सचिव, कार्यालय प्रमुख वा मन्त्रीमाथि नै पुर्नविचार गरिने उनको भनाइ छ ।

उनले एक पनि टिप्पणी नउठाई वर्ष दिनको तलब खाने कर्मचारीले श्रममा भ्रष्टाचार गरेको बताउँदै आगामी दिनमा काम गर्नेलाई मात्रै प्रोत्साहित पार्ने बताए । मुख्यमन्त्री शाहीले अन्य प्रदेशका योजना बहुवर्षीयमा लिइएका कारण वित्तीय प्रगति बढि देखिएको बताउँदै आगामी दिनमा आफूहरु पनि त्यसरी नै विकास निर्माणमा लाग्ने प्रतिबद्धता जनाए ।

उनले कर्णालीमा अहिले पनि प्रमुख सचिव, मन्त्रालयका सचिवहरु रिक्त रहेको बताउँदै यो समस्याले सरकारलाई काम गर्न असहज बनाएको बताए । ‘चार महिना पछि सचिव आउँछन्, दुई महिना बस्छन् जान्छन्,’ उनले भने, ‘यसले पनि काम गर्न हामीलाई समस्या परेको छ ।’

मुख्यमन्त्री शाहीले पत्रकार सम्मेलनमा प्रमुख क्षेत्रहरुको प्रगति विवरण प्रस्तुत गर्दै एक वर्षमा जम्मा १ किलोमिटर ८२० मिटर सडक कालोपत्रे गरिएको बताए । उनका अनुसार कर्णालीमा ३८१.०३ किमि सडकको ट्रयाक विस्तार भएको, १५६.२६ किलोमिटर सडक थप विस्तार भएको र ४९ किमि सडक ग्राभेल भएको छ ।

 

 

शेरबहादुर थापा
शेरबहादुर थापा

लेखकबाट थप...

कमेन्ट गर्नुहोस्