सरकारले पश्चिम रुकुमको चौरजहारी नगरपालिका—८ सोतीमा भएको घटनामा ज्यान गुमाएका व्यक्तिका परिवारलाई राहत उपलब्ध गराउने निर्णय गरेको हो।

सोमबारको मन्त्रिपरिषद् बैठकले सोती घटनामा ज्यान गुमाउने ६ जनाका परिवारलाई प्रतिपरिवार १० लाख रुपैयाँ दिने निर्णय गरेको हो।

गत जेठ १० गते पश्चिम रुकुमको चौरजहारी ८ सोतीमा भएको घटनामा ६ जनाले ज्यान गुमाएका थिए। 
घटनामा जाजरकोटको भेरी नगरपालिका ४ का नवराज विक, गणेश बुढामगर, संजिव विक, भेरी ११ का लोकेन्द्र सुनार, गोविन्द शाही र रुकुम चौरजहारी १ का टिकाराम नेपालीको ज्यान गएको थियो।

यसैगरी, घटनामा १२ जनाको उपचारको खर्च पनि सरकारले व्यहोर्ने निर्णय बैठकले गरेको छ।

घटनामा भेरी ४ का लालबहादुर खड्का, मदन शाह, सरोज भडेल, आशिष विक, सुदिप खड्का, भेरी ३ का विभाग पुन, इन्द्रगंज शाही, भेरी १३ का भोला बिसी, भेरी ११ का गोविन्द सुनार, भेरी ३ का महेश कार्की, सल्यानको कुमाख ४ का डिल्ली विक र बाँकेको राप्ती सोनारी ४ का सुनिल सुनार घाइते भएका थिए। घाइतेको उपचारमा लागेको खर्च बिलका आधारमा सरकारले भुक्तानी गर्ने भएको हो।