बुधवार सार्वजनिक भएको बलिउड फिल्म सडक २ को ट्रेलरले यूट्युबमा अहिलेसम्म ५७ लाख डिसलाइक कमाएको छ । 

यस भिडियोमा लाइक र डिसलाइकको अनुपातमा निकै ठूलो अन्तर छ । ट्रेलरमा ३ लाख १५ हजार मात्र लाइक आएका छन् । 

अनुपातमा हेर्दा सडक २ को ट्रेलर सर्वाधिक डिसलाइक पाउने भिडियो बनेको छ । यसले ९४.७५ प्रतिशत डिसलाइक पाएको छ भने जम्मा ५.२५ प्रतिशत लाइक पाएको छ ।

सडक २ को ट्रेलरले स्विडेनका गेमर प्युडीपाईको भिडियो क्यान दिस भिडियो गेट वान मिलियन डिसलाइक्सको सर्वाधिक​ डिसलाइक अनुपातलाई उछिनेको हो । उक्त भिडियोले ४० लाख ८८ हजार डिसलाइक पाएको छ जुन ९३.८० प्रतिशत डिसलाइक हो । 

संख्याको आधारमा हेर्दा चाहिँ यूट्युबमा सर्वाधिक डिसलाइक कमाउने भिडियो सन् २०१८ को डिसेम्बर ६ मा सार्वजनिक भएको ‘यूट्युब रिवाइन्ड २०१८ : एभ्रिवान कन्ट्रोल्स रिवाइन्ड’ हो । यसले एक करोड ८१ लाखभन्दा बढी डिसलाइक पाएको छ । 

दोस्रो नम्बरमा गायक जस्टिन बीबरको 'बेबी' गीतको भिडियो छ । त्यसले १ करोड १५ लाख ७० हजार डिसलाइक पाएको छ ।

सडक २ को ट्रेलरले यही रफ्तारमा डिसलाइक कमाउने हो भने ‘यूट्युब रिवाइन्ड २०१८ : एभ्रिवान कन्ट्रोल्स रिवाइन्ड’ लाई पनि उछिन्न सक्ने सम्भावना छ । 

बलिउड अभिनेता सुशान्त सिंह राजपूतको निधनपछि चर्किएको नातावाद सम्बन्धी बहसका कारण सडक २ को ट्रेलर यूट्युब प्रयोगकर्ताहरूको कोपभाजनमा परेको हो । सडक २ मा सबै प्रमुख कलाकारहरू र निर्देशक कुनै न कुनै बलिउड सेलेब्रिटीका सन्तान वा नातेदार हुन् ।