नयाँ प्रविधिको उपयोग गरी गाईबाच्छा बचाइँदै

दुर्घटनामा परेका, विविध रोगव्याधि लागेका र तागत नभएका कारण बसेका ठाउँबाट उठ्न नसक्ने असहाय गाईबाच्छा बचाउन विशेष उपकरणको प्रयोग हुन थालेको छ ।

विभिन्न समस्याका कारण जीवन जोखिममा परेका गाईबाच्छा सामान्य तरिकाबाट जोगाउन असम्भव हुन थालेपछि उपकरण प्रयोगमा ल्याइएको छाडा गाईबाच्छ संरक्षण अभियानका अभियानकर्मी उत्तम पुडासैनीले राससलाई जानकारी दिए ।
 
आफ्नै शरीर भारी भइसकेका अवस्थामा त्यस्ता अधिकांश गौप्राणी मर्न थालेपछि  अभियानकर्मी भगवान् पुडासैनीको विशेष निगरानी र पहलमा अशक्त गाईबाच्छालाई उभ्याउन सक्ने एवं उठाउन मिल्ने विशेष उपकरण तयार गरिएको उनले बताए । संविधानले राष्ट्रिय जनावरको मान्यता दिए पनि उपकरणका अभावमा गाईबाच्छा बचाउन कसैले पहल गरेको थिएन ।
 
घिर्नीको सहयोगबाट ६०० किलोसम्मको गाईबाच्छालाई उठाएर राख्न सकिने उपकरण गोठाटारमा सञ्चालित असहाय गाईबाच्छा संरक्षण अभियानमा नौलो प्रयोगका रुपमा प्रस्तुत गर्न थालिएको छ ।
 
यसको सफल प्रयोगपछि काठमाडौँ उपत्यकाभित्र दुर्घटनामा परेका एवं अशक्त धेरै बाच्छाबाच्छीले जीवन पाउने विश्वास गरिएको छ । करीब रु ३५ हजारमा निर्मित उपकरण बनाउन कागेश्वरी मनोहरा नगरपालिका–४ डाँछी निवासी सुन्दरराज पुडासैनीले रु पाँच हजार सहयोग गरेका थिए ।
 
यसैगरी असहाय गाईबाच्छा संरक्षणका लागि एक व्यक्ति एक दिन अभियानअन्तर्गत वर्षमा एक दिन विशेष अवसरमा औषधोपचार र भोजन व्यवस्थापनमा आउनेको पनि भीड लाग्न थालेको छ । केदार सञ्जेल आफ्नी छोरीको पुण्यतिथिका अवसरमा गाईबाच्छालाई सहयोग गर्न आज संरक्षणस्थल पुगे ।
 
बहिनीको पुण्यतिथिका अवसरमा यानप्रसाद अधिकारीले असहाय गाईबाच्छाका लागि योगदान गर्ने प्रतिबद्धता जनाएका छन्। यसैगरी धेरै व्यक्तिले सहयोगको वाचा गर्नुभएको अभियानले जनाएको छ । 
 
असहाय बाच्छाबाच्छी संरक्षण अभियानका लागि बौद्धस्थित भेटरान क्लबका तर्फबाट खाद्यान्न उपलब्ध भएको छ । यस्तै अभियानकर्मीका सहयोगमा त्रिभुवन अन्तरराष्ट्रिय विमानस्थलको उत्तरी भेगस्थित वाग्मती किनार र गोठाटारमा रहेको पशुपति क्षेत्र विकास कोषको जग्गामा करीब २०० असहाय गाईबाच्छा संरक्षण गरिएको छ ।
 
राजधानीमा गाईपालकले बाच्छा जन्मिए केही महिनामै सडक, मन्दिर वा नदी किनारमा छाडिदिने गरेका छन् । गौपालकले गर्ने यस्ता कुकृत्य रोक्न कुनै पनि स्थानीय तहले पहल गरेका छैनन् ।
 


Advertisement


Advertisement

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्