ओलीले मोदीलाई भने-अर्थपूर्ण द्विपक्षीय सहयोगको अपेक्षा छ

नेपाल र भारतका परराष्ट्र मन्त्रालयकाे छुट्टाछुट्टै विज्ञप्ति

फाइल फोटो।

नेपालका प्रधानमन्त्री केपी शर्मा ओलीले भारतीय प्रधानमन्त्री नरेन्द्र मोदीसँग शनिवार टेलिफोन वार्ता गरेका छन्।

यससँगै नेपाल र भारतबीच लामो समयदेखिको संवादहीनता तोडिएको छ। परराष्ट्र मन्त्रालयका अनुसार दुबै देशका प्रधानमन्त्री भविष्यमा द्विपक्षीय विषयका छलफललाई निरन्तरता दिन सहमत भएका हुन्।


Advertisement

टेलिफोन वार्ताका क्रममा प्रधानमन्त्री ओलीले गत चैत २८ गते प्रधानमन्त्री मोदीसँग भएको कुराकानीको स्मरण गर्दै भारतको ७४ औँ स्वतन्त्रता दिवसका अवसरमा उनलाई बधाई एवं शुभकामना व्यक्त गरे।

परराष्ट्रद्वारा जारी प्रेस विज्ञप्तिमा भनिएको छ, ‘नेपालका प्रधानमन्त्रीले अर्थपूर्ण द्विपक्षीय सहयोगको अपेक्षा गर्नुभयो।’


Advertisement

कुराकानीका क्रममा दुवै देशका प्रधानमन्त्रीले कोभिड-१९ विरुद्ध गरिएका पछिल्ला प्रयासबारे विचार आदानप्रदान गर्नाका साथै महाव्याधिको क्षेत्रमा सहकार्य गर्न सहमत भएका हुन्।

महामारीबाट नेपाली जनतालाई जोगाउन तथा त्यसविरुद्ध नेपाल सरकारका प्रयासबारे जानकारी गराउँदै प्रधानमन्त्री ओलीले कोभिड-१९ विरुद्धको खोप चाँडोभन्दा चाँडो विकास हुनुपर्नेमा जोड दिए।

भारतीय विदेश मन्त्रालयका अनुसार दुबै देशका प्रधानमन्त्रीबीच कोरोना भाइरस रोकथामका विषयमा कुराकानी भएको हो।

भारतीय विदेशद्वारा जारी प्रेस विज्ञप्तिमा उल्लेख भए अनुसार नेपालका प्रधानमन्त्री ओलीले भारत संयुक्त राष्ट्रसंघीय सुरक्षा परिषद्को अस्थायी सदस्यमा निर्वाचित भएकामा प्रधानमन्त्री मोदीलाई बधाई ज्ञापन गरेका थिए।  

मोदीले कोरोनाविरुद्ध लड्न नेपाललाई सहयोगका प्रतिवद्धता जनाएको भारतीय विदेश मन्त्रालयको विज्ञप्तिमा उल्लेख छ।

गत चैत २८ मा सार्क राष्ट्रका सरकार प्रमुखसँगको भर्चुअल सम्वादमा ओली र मोदीबीच कुराकानी भएको थियो। त्यसयता दुई प्रधानमन्त्रीबीच कुरा हुन सकेको थिएन । 

कुटनीतिक वार्ता मार्फत भारतले अतिक्रमण गरेको नेपाली भूमि फिर्ता ल्याउन सरकारलाई सत्तारुढ नेकपाले आग्रह गरेको थियो। यस्तै संसदका समितिहरुले पनि अतिक्रमित भूमिमा नेपाली भोगाधिकार स्थापित गर्न सरकारलाई निर्देशन दिएका थिए।

दुई प्रधानमन्त्रीबीचको फोनवार्तासँगै नेपाल भारतबीचको संवादहीनता तोडिएको छ।

यसै साता काठमाडौंमा भारतीय राजदूत र नेपालका परराष्ट्रसचिव स्तरको संयन्त्रको बैठक हुने कार्यक्रम छ । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्