सर्वोच्च अदालतले नेत्रविक्रम चन्द विप्लव नेतृत्वको नेकपाकी नेतृ उमा भुजेललाई थुनामुक्त गर्न आदेश दिएको छ ।

सर्वोच्चका न्यायाधीशद्वय दीपकुमार कार्की र हरिकृष्ण कार्कीको इजलासले आइतवार भुजेललाई थुनामुक्त गर्न आदेश दिएको भुजेलका तर्फबाट बहस गरेका वरिष्ठ अधिवक्ता एकराज भण्डारीले लोकान्तरलाई जानकारी दिए । 

सप्तरी जिल्लाको इलाका प्रहरी कार्यालय कञ्चनपुर सप्तरीमा थुनामा रहेकी भुजेललाई रिहा गर्न माग गर्दै प्रतिमा भुजेलले सर्वोच्चमा रिट दायर गरेकी थिइन् ।

२०७६ पुस १२ गते पक्राउ परेकी भुजेललाई जिल्ला अदालतले थुनामुक्त गरेलगत्तै अदालतको गेटबाटै प्रहरीले पक्राउ गरेको थियो । 

‘थुनामुक्तको आदेशले मात्र पुग्दैन अदालतको आदेशको अवज्ञा गर्ने गृहमन्त्री र प्रहरी महानिरीक्षकलाई अवहेलनामा कारवाही गर्नुपर्छ भन्ने माग दाबी गरेको थिएँ । उनलाई सर्वोच्च या मानव अधिकार आयोगमा ल्याएर रिहा गर्नुपर्छ भनेको थिएँ, आदेशको प्रति कुरेर बसेको छु,’ भण्डारीले भने ।