भारतको कर्नाटनकमा रहेका कैयौं मन्दिरमा प्रसादका रूपमा गाँजा दिइने गरेको छ । 
 

सरना, अवधूत, शप्थ, अरुणा परम्परामा श्रद्धालुलाई गाँजा दिइने गर्छ । उनीहरू गाँजामार्फत आध्यात्मिक बोध मिल्छ भन्छन् । 
 

यादगीर जिल्लामा रहेको तिनथिनीस्थित मौनेश्वर मन्दिरमा जनवरी महिनामा हुने वार्षिक मेलामा ठूलो संख्यामा श्रद्धालुहरू आउने गर्छन् । त्यहाँ भक्तहरूलाई प्रसादका रूपमा गाँजाका प्याकेट बाँडिन्छन् । मौनेश्वर वा मनप्पाको प्रार्थना गरेपछि उक्त गाँजा सेवन गरिन्छ । 

मन्दिर समितिका सदस्य गंगाधर नायकले गाँजाको प्रयोग व्यापक मात्रामा हुने गरेको बताए । मौनेश्वरले मानिसहरूलाई गाँजा दिएकोले यहाँ गाँजा सेवनको परम्परा नै चलेको उनी बताउँछन् । 

मन्दिर बाहिर गाँजा बिक्री हुने गरेको कुरालाई उनले ठाडै अस्वीकार गरे । 

केही श्रद्धालुले मन्दिर गएर गाँजा तान्ने गरेको नायकले बताए । केही मानिसले उमालेर गाँजा खाने अनि केहीले चाहिँ धूलो बनाएर खाने गरेको उनको भनाइ छ । 
 

सरना समुदायमा अनुसन्धान गरेकी प्राध्यापक मीनाक्षी बालेले मन्दिरमा गाँजाको सेवन गर्नेहरूलाई त्यसको लत नलागेको बताइन् । 

परम्परालाई सम्मान गर्दै प्रहरी मन्दिरतिर जाने गरेको छ र उजुरी आउँदा पनि बेवास्ता गर्ने गरेको छ । तर रायचुरका एसपी प्रकाश नित्यमले सूचना पाइएमा मन्दिर वा मठमा पनि छापा हान्ने बताए ।