बृहन्मुम्बई म्युनिसिपल कर्पोरेसन (बीएमसी) ले अभिनेत्री कंगना रनावतको पाली हिलस्थित कार्यालय भवन भत्काइरहेकोमा बम्बे उच्च अदालतले त्यसमा रोक लगाएको छ । 
 

कंगनाले मुम्बईलाई पाकिस्तानअधीनस्थ कश्मीरसँग तुलना गर्दै ट्वीट गरेपछि महाराष्ट्र सरकारले कंगनाको कार्यालय भत्काउन लगाएको थियो । 

तर उच्च अदालतले हालका लागि त्यसमा रोक लगाउँदै बीएमसीलाई कंगनाको निवेदनको जवाफ फर्काउन भनेको छ । 

बुधवार बीएमसीका अधिकारीहरूले कंगनाको कार्यालय पुगेर ‘अवैध संरचना’ भत्काउन थालेका थिए । कंगना भने चण्डीगढबाट मुम्बई आउने विमान चढिरहेकी थिइन् । 
 

कंगनाका वकिल रिजवान सिद्दीकीले बम्बे उच्च अदालतमा भिडियो कन्फरेन्सिङमार्फत निवेदन दर्ता गरेर भवन भत्काउनमा रोक लगाउनका लागि आदेशको मागदाबी गरेका थिए ।

न्यायाधीश एसजे काठवालाले कंगनाको तर्फबाट आएको निवेदनमाथि सुनुवाइ गर्दै बीएमसीको काम रोक्ने आदेश दिएको हो । 

अदालतले बीएमसीको दलील बिहीवार सुन्ने भएको छ ।