असोज ७ गतेभित्र नेपालमा रेल आउने, सञ्चालनका लागि यसरी हुँदैछ तयारी

अजय अनुरागी
अजय अनुरागी

अजय अनुरागी लोकान्तरका लागि खोज, राजनीति र समसामयिक विषयवस्तुमा कलम चलाउँछन् ।

नेपालका लागि भारतमा बनेको रेल असोज ७ गतेभित्र जनकपुर आइपुग्ने निश्चित भएको छ ।

भारतको मद्रासस्थित इन्टीग्रल कोच फ्याक्ट्रीमा बनेको रेल अबको ७–१० दिनभित्र जनकपुरधाम आइपुग्ने निश्चित भएको रेल विभागका महानिर्देशक बलराम मिश्रले बताए । 


Advertisement

राम–जानकी विवाह पञ्चमीको तिथिबाट रेल सञ्चालनमा आउने भनेर रेल विभागका पदाधिकारीले आश्वासन दिए पनि रेल जनकपुर नआउँदा स्थानीय निराश भएका थिए । 
‘अबको ७–१० दिनभित्र नेपाल सरकारले भारत सरकारसँग किनेको रेल जनकपुरधाम आइपुग्ने छ,’ महानिर्देशक मिश्रले लोकान्तरसँग भने, ‘भारतीय पक्षसँग सम्झौतामा हस्ताक्षर गर्ने जिम्मेवार एक व्यक्ति म आफैं भएकाले पनि विश्वास गर्नुपर्ने हुन्छ ।’ 

आगामी १० दिनभित्र रेल आउने कुरामा ढुक्क रहेका उनले बढीमा २ महिनाभित्र रेल सेवा सञ्चालनमा आइसक्ने समेत बताए । भारतको मद्रासस्थित कारखानामा बनेको रेल बिहारको हाजीपुरस्थित रेल्वे स्टेसनमा ६ महिनाअघि नै आइसकेको समेत उनले बताए ।


Advertisement

‘सम्झौता अनुसार मोबिलाइजेसनको २० प्रतिशत रकम नेपाल सरकारले बुझाइसकेको छ,’ मिश्रले भने, ‘बाँकी ८० प्रतिशत रकम रेल जनकपुर आएर परीक्षण भए पछि मात्र भुक्तानी गरिने छ ।’

कर्मचारी भर्नाका लागि रेल्वे कम्पनीद्वारा विज्ञापन आह्वान

रेल सञ्चालन गर्न कर्मचारी नरहेका कारण नेपाल सरकारको पूर्ण स्वामित्वको नेपाल रेल्वे कम्पनीले विभिन्न कर्मचारी भर्नाका लागि विज्ञापन आह्वान गरेको छ । रेल्वे कम्पनीले खुला प्रतिस्पर्धाद्वारा विभिन्न पदमा आवश्यक परेका १२९ जना कर्मचारीलाई करार सेवामा कर्मचारी परिपूर्ति गर्नको लागि भदौ २९ गते  विज्ञापन निकालेको छ ।

शाखा अधिकृतको लागि अधिकृत तृतीय स्तरमा प्रशासन सेवाको लागि समान्य प्रशासनतर्फ १ जना कर्मचारी माग गरेको छ । कानून अधिकृत १ जना र स्टेसन मास्टर ३ जना माग गरिएको छ । यी ३ पदको लागि न्यून्तम योग्यता स्नातक माग गरिएको छ । कानून अधिकृतको लागि कानून विषयमै स्नातक उत्तीर्ण उम्मेदवार माग गरिएको छ ।

पाँचौ तहको लागि सबइन्जिनीयरतर्फ मेकानिकल पदमा १ जना माग गरिएको छ । जसको लागि न्यूनतम योग्यता मेकानिकल वा इन्डस्ट्रियल वा अटोमोबाइल इन्जिनीयरिङ डिप्लोमा वा सो सरह माग गरिएको छ । पाँचौ तहमा सहायक प्रथम स्तरकै ईन्जिनीयरिङ सेवातर्फ इलेक्ट्रीकलतर्फ पनि १ जना सबइन्जिनीयर माग गरिएको छ । जसको लागि इलेक्ट्रीकल इन्जिनीयरिङ विषयमा डिप्लोमा वा सो सरह उतीर्णको योग्यता माग गरिएको छ । 

उम्मेदवारको उमेर हदमा अधिकृत स्तरको लागि २१ वर्ष र सहायक स्तरको लागि १८ वर्ष उमेर पूरा भई ३५ वर्ष उमेर ननाघेको र महिलाको हकमा भने ४० वर्ष उमेर ननाघेको हुनुपर्ने तथा रेल्वे कम्पनीको पूर्व कर्मचारीको हकमा भने ५५ वर्ष ननाघेको हुनुपर्ने उल्लेख गरिएको छ । आवेदनको लागि असोज १२ गतेसम्म अन्तिम मिति तोकिएको छ ।

यस्तो छ विज्ञापन

 

अजय अनुरागी
अजय अनुरागी

लेखकबाट थप...

कमेन्ट गर्नुहोस्