काठमाडौं महानगरपालिकाले असोज १ गतेदेखि विद्युतीय प्रणालीमार्फत राजश्व निर्धारण तथा संकलन गर्ने भएको छ । 

सोमवार एक अन्तर्क्रिया कार्यक्रमको आयोजना गरी महानगरपालिकाले आगामी असोज १ गतेदेखि विद्युतीय प्रणालीमार्फत कर संकलन गर्ने जनाएको हो । 

अनलाइनको माध्यमबाट भुक्तानी प्रणालीलाई सहज बनाउन महानगरपालिकाले अगाडि बढेको हो । यसअघि महानगरपालिकाले विद्युतीय माध्यमबाट नक्सा स्वीकृतिमा विद्युतीय हस्ताक्षर प्रणाली सार्वजनिक गरेको थियो । 

महानगरपालिकाले विद्युतीय माध्यमबाट राजश्व संकलन शुरू गर्ने भएसँगै महानगरवासीले घरमै बसेर सहज रूपमा कर भुक्तानी गर्न पाउने भएका छन् । 

कोरोना महामारीका बीचमा विद्युतीय माध्यमबाट कर भुक्तानी गर्दा लक्ष्य अनुरुपको राजश्व संकलन हुने महानगरले विश्वास व्यक्त गरेको छ । 

कार्यक्रममा बोल्दै महानगरपालिकाका प्रमुख प्रशासकिय अधिकृत एकनारायण अर्यालले अनलाइन प्रविधिमार्फत राजश्व संकलन गर्दा २० देखि ३० प्रतिशत वृद्धि गर्ने अनुमान गरेका छन् । उनले भने, ‘हामी कोरोना महामारीको विषम परिस्थितीमा छौं, यस्तो अवस्थामा अनलाइन प्रणालीबाट कर भुक्तानी सेवा सञ्चालन गर्दा आगामी वर्ष २० देखि ३० प्रतिशत बढी कर संकलन हुन्छ भन्ने अनुमान गरेका छौं ।’

असोजदेखि महानगरभित्रका सबै वडामा अनलाइन सेवा सञ्चालन गर्नेगरी काम भइरहेको उनले बताए । उनका अनुसार, असोज १ गतेदेखि कुनै वडामा ट्रायलका रूपमा शुरुवात गर्छौं र अन्यमा पनि विस्तार गर्दै लैजान्छौं ।