पछिल्लो समय नेपालका सुरक्षा निकायमा कोरोना भाइरसको संक्रमण व्यापक रुपमा फैलिएको छ ।

अहिलेसम्म सुरक्षाका सेना, जनपद र सशस्त्र ३ वटा निकायमा ६ हजार भन्दा धेरैलाई कोरोना भाइरसको संक्रमण पुष्टि भइसकेको छ ।

विषेश गरेर पहिलो पंक्तिमा खटिने प्रहरीमा सबैभन्दा धेरै कोरोना भाइरसको संक्रमण देखिएको छ ।

जनपद प्रहरीमा हालसम्म ३ हजार ४ सय भन्दा धेरै प्रहरी कर्मचारीलाई कोरोना भाइरस संक्रमण पुष्टि भइसकेको प्रहरी केन्द्रीय कार्यालय नक्सालको तथ्याङ्क छ ।

जनपद प्रहरीमा ३४ सय संक्रमित

‘अहिलेसम्म प्रहरीमा ३ हजार ४ सय जनालाई कोरोना संक्रमण भइसकेको छ,’ नेपाल प्रहरीका प्रवक्ता वरिष्ठ प्रहरी उपरिक्षक (एसएसपी) कुवेर कठायतले भने, ‘१ हजार ७ सय ७६ जना सक्रिय संक्रमित छन् ।’

केहि समय अगाडि कोरोना भाइरसको संक्रमण व्यापक रुपमा फैलिएको केन्द्रीय कार्यालय नक्सालमा हालसम्म ५ सय भन्दा धेरै जनालाई कोरोना संक्रमण पुष्टि भइसकेको छ भने अहिले पनि २ सय १९ जना सक्रिय संक्रमित रहेका छन् ।

कोरोना संक्रमण देखिएका प्रहरी कार्यालयहरूमा नजिकैको अन्य कार्यालयहरूबाट जनशक्ति लगेर शान्ति सुरक्षाको काम भइरहेको प्रहरी केन्द्रीय कार्यालयले जनाएको छ ।

सशस्त्रमा ९ सय ६० संक्रमित

यस्तै सशस्त्र प्रहरीमा पनि कोरोना संक्रमणको दर बढ्दै गएको छ । सशस्त्र प्रहरी बल केन्द्रिय कार्यालय हलचोकको तथ्याङ्कअनुसार हालसम्म देशभरमा ९ सय ६० जना कर्मचारीलाई कोरोना संक्रमण पुष्टि भएको छ । त्यसमध्ये ६ सय २१ जना निको भएर सेवामा फर्किसकेको र ३ सय ३९ जना सक्रिय संक्रमित रहेको सशस्त्र प्रहरी बलका प्रवक्ता प्रहरी नायव महानिरीक्षक (डीआइजी) राजु अर्यालले बताए ।

‘एपीएफमा ९ सय ६० जनालाई कोरोना संक्रमण पुष्टि भएको छ । ६ सय २१ जनानिको भएर सेवामा फर्किसकेका छन्,’ डीआइजी अर्यालले लोकान्तरसँग भने ।

सक्रिय संक्रमितको संख्या धेरै नभएकाले ड्युटीमा खासै असर नपरेको डीआइजी अर्यालले बताए ।

नेपाली सेनामा १९ सय ४२, १ जनाको ज्यान गयो  

यस्तै नेपाली सेनामा पनि कोरोना भाइरसको संक्रमित बढीरहेका छन् । जनसम्पर्क तथा सूचना निर्देशनालय जङ्गी अड्डाका अनुसार हिजो पछिल्लो २ दिनमा ४३ जनामा कोरोना भाइरसको संक्रमण पुष्टि भएको छ ।

हालसम्म १ हजार ९ सय ४२ जना सेनाका सकलदर्जामा कोरोना भाइरसको संक्रमण पुष्टि भएको छ । जसमध्ये ३ सय ५९ जना निको भएर सेवामा फर्किसकेका छन् ।

सेनामा हाल १ हजार ५ सय ८२ जना संक्रिय संक्रमित छन् भने १ जना सेनाका जवानको कोरोना भाइरसका कारण ज्यान गएको जङ्गी अड्डाले जनाएको छ ।