अमेरिकाका राष्ट्रपति डोनल्ड ट्रम्पले चिनियाँ स्वामित्वको टिकटक अमेरिकामा चलिरहन दिनका लागि हुने सम्झौतालाई आशीर्वाद दिएको बताएका छन् । 

टिकटक र अमेरिकी कम्पनीहरू ओराकल तथा वालमार्टबीच हुने साझेदारीलाई आफूले स्वीकृति दिएको उनको भनाइ छ । 

ट्रम्पले राष्ट्रिय सुरक्षाको कारण देखाउँदै अमेरिकामा टिकटक प्रतिबन्ध लगाउन आदेश दिएका थिए । 
 

टिकटकको स्वामित्व रहेको चिनियाँ बाइटडान्स कम्पनीले चिनियाँ सरकारलाई डेटा उपलब्ध गराइदिने डर अमेरिकी अधिकारीहरूले लिएका थिए । 

तर बाइटडान्सले डेटाहरू नियन्त्रणमा लिने गरेको वा चिनियाँ कम्युनिस्ट पार्टीलाई दिने गरेको आरोप खारेज गरेको छ । 

यस सम्झौताले १० करोड अमेरिकी प्रयोगकर्ताको डेटा सुरक्षित रहने सुनिश्चित गर्ने भन्दै शनिवार ट्रम्पले टिप्पणी गरे, ‘सुरक्षा शतप्रतिशत रहनेछ ।’

‘सम्झौताका लागि मैले आशीर्वाद दिएको छु,’ नर्थ क्यारोलाइनामा निर्वाचन भेलालाई सम्बोधन गर्न जानुअघि ह्वाइट हाउसमा उनले पत्रकारहरूलाई बताए । ‘सम्झौताको अवधारणालाई मैले स्वीकृति दिएको छु ।’

टिकटक र बाइटडान्स दुवैले प्रस्तावित सम्झौतामा ट्रम्पले दिएको स्वीकृतिको स्वागत गरेका छन् । तर यसमा चीन सरकारले हस्ताक्षर गर्न बाँकी नै छ ।