बलिउड अभिनेत्री पायल घोषले फिल्म निर्देशक अनुराग कश्यपमाथि यौन दुर्व्यवहारको आरोप लगाएकी छन् ।

एकपटक कश्यप आफूअगाडि नांगिएको र आफूसँग नजिकिन खोजेको उनको आरोप छ । 
 

आईएएनएससँगको अन्तर्वार्तामा घोषले सन् २०१४ मा उक्त घटना भएको र त्यसले आफूलाई अझैसम्म पनि सताउने गरेको बताइन् । 
‘

प्रसिद्ध निर्देशकले मलाई दुर्व्यवहार गरे । आफूसँग काम गर्ने केटीहरूले मस्तीका पल बिताउने गरेको उनले मलाई बताए । त्यतिखेर उनले सिर्जना गरेको परिस्थिति निकै लाजमर्दो थियो,’ उनले भनिन् । 

निर्देशकको नाम लिन भन्दा घोषले भनिन्, ‘अनुराग कश्यपले मलाई सन् २०१४ मा दुर्व्यवहार गर्न खोजेका थिए ।’

यत्तिका वर्षसम्म चुप लागेर अहिले किन यो विषय उठाएको भनी सोध्दा पायलले भनिन्, ‘मैले यसका बारेमा धेरैपटक बोल्ने प्रयास गरेकी थिएँ तर मेरो परिवार र नजिकैका साथीले मलाई भविष्यमा समस्या आउँछ, नबोल भने । म यसबारेमा कुरा गर्न चाहन्थें तर मलाई मौन बनाइयो । हामीले यसबारेमा कुरा गर्नुपर्छ ताकि उनी जस्ता मानिसले शक्तिको दुरुपयोग गर्न नपाऊन् ।’

घटनाको स्मरण गर्दै पायलले भनिन्, ‘शुरूमा म यारी रोडमा रहेको उनको अफिस पुगें । उनी अरू कसैसँग कुरा गरिरहेका थिए र मलाई अगाडि बस्न भने । उनलाई व्यस्त देखेर म हिँडें । अर्को दिन उनले मलाई फोन गरेर अभिनेत्री जस्तो देखिने गरी तडकभडक नगरी आउन भने । मलाई सादा कपडा लगाएर आउन उनले सुझाव दिए । त्यसैले म उनलाई सलवार कमीज लगाएर भेट्न गएँ । उनले मेरा लागि खाना पकाए, भाँडा पनि माझे । म एकछिनपछि हिँडें र उनले मलाई मेसेज गरेर फेरि आउन भने । धेरै राति भएकाले म गइनँ ।’

त्यसको तीन दिनपछि अनुरागले दुर्व्यवहार गरेको पायलको भनाइ छ । 

‘उनको घर पुग्दा उनले मलाई रणवीर कपूरसँग फिल्म खेल्नका लागि केटीहरू आफूसँग सुत्न तयार भएको बताए ।’

अनि अनुरागले त्यतिबेलै अश्लील फिल्म हेर्न थालेको पायलको भनाइ छ । 

‘मलाई त्यतिखेर डर लाग्यो । उक्त कोठामा थुप्रै क्यासेट, किताब र सोफा थिए । त्यो पुस्तकालय जस्तो देखिन्थ्यो । अचानक उनी मेरो अगाडि नांगिए र मलाई लुगा खोल्न भने । मैले म यसमा सहज छैन भनें,’ पायलले दाबी गरिन् । 

‘उनले भने– मैले काम गरेका सबै अभिनेत्रीहरू मेरो एक कलमा मसँग सुत्न आउँछन् ।’

‘मैले आफू असहज तथा अस्वस्थ भएको बताउँदै त्यहाँबाट भागें । त्यस घटनापछि मैले उनलाई कहिल्यै भेटिनँ ।’

‘घटनापछि पनि उनले कैयौंपटक मलाई भेट्न भनेका थिए तर मैले भेटिनँ । त्यस घटनाले मलाई अझैसम्म पनि सताउँछ,’ उनले भनिन् । अनुरागले त्यसबेलामा डिभोर्स नलिएको उनले बताइन् । 

अनुराग कश्यपले चाहिँ यो मिथ्या आरोप भएको र आफूलाई फसाउनका लागि षड्यन्त्र गरिएको बताएका छन् । 
 

कंगना रनावतले पायलको साथ दिँदै अनुराग कश्यपलाई तत्काल पक्राउ गर्न आह्वान गरेकी छन् ।