भारतको माथिल्लो सदन राज्यसभामा आइतवार कृषि विधेयकका विषयमा चर्चा चल्दै गर्दा विपक्षी दलका सांसदहरूले हंगामा मच्चाएका छन् । 
 

राज्यसभाका सभापति एम वेंकैया नायडू यस घटनाका कारण आक्रोशित छन् । उनले हंगामा गर्ने आठ सांसदहरूलाई बाँकी सत्रभरिका लागि निलम्बित गरेका छन् । 

सभापतिले सोमवार सदनको कारवाही अघि बढाउँदै गर्दा आइतवार राज्यसभाको खराब दिन भएको बताए । केही सदस्यहरू सभापतिको वेलसम्म आइपुगेका थिए । उपसभापतिलाई धकेलाधकेल समेत गरिएको थियो । 

‘केही सांसदले पेपर फ्याँके, माइक तोडे, रुल बूक फ्याँके । यस घटनाबाट म दुःखित छु । उपसभापतिलाई धम्की दिइयो । उनीमाथि आपत्तिजनक टिप्पणी गरियो,’ सभापति नायडूले भने । 

सभापतिले निलम्बित गरेका आठ सांसदहरू डेरेक ओ ब्रायन, संजय सिंह, रिपुन बोरा, सैयद नजीर हुसैन, केके रागेश, ए करीम, राजीव साटव र डोला सेन हुन् ।
 

उपसभापतिविरुद्ध विपक्षी सांसदहरूले ल्याएको अविश्वास प्रस्ताव नियममुताबिक नरहेको सभापतिले बताए । सभापतिको कारवाहीपछि पनि सदनमा हंगामा जारी रह्यो । 

आइतवार कृषिमन्त्री नरेन्द्र सिंह तोमरको जवाफबाट असन्तुष्ट कांग्रेस र आम आदमी पार्टीका सांसद वेल पुगेका थिए । विपक्षीहरूले हंगामा गर्दागर्दै तोमरले जवाफ दिइरहे । 

किसान विधेयकको विरोध गरिरहेका विपक्षी सांसदले विधेयकको प्रति खोस्ने कोशिश गरे । त्यसक्रममा उपसभापतिको माइक उखेलियो । नजिकै उभिएका मार्शलले उनीहरूलाई रोके । 

संसदमा हंगामा गरिरहेका सांसदहरूले आफ्नो आसनअगाडिको माइक फुटाए । तृणमूल कांग्रेसका सांसद डेरेक ओब्रायनले उपसभापतिकै अगाडि नियम पुस्तिका च्याते । त्यसपछि राज्यसभाको बैठक स्थगन गरिएको थियो ।