चीनका लागि जासूसी गरेको आरोपमा भारतीय पत्रकार पक्राउ, नेपाली पनि संलग्न रहेको दाबी

भारतको सीमा रणनीति तथा सैनिक तैनाथीको संवेदनशील सूचना चिनियाँ गुप्तचरहरूलाई दिएको आरोप लगाउँदै भारतीय प्रहरीले दिल्लीमा बस्ने एक पत्रकारलाई पक्राउ गरेको जनाएको भनी भारतीय सञ्चारमाध्यमहरूले खबर दिएका छन् । 

दुई देशबीच तनावको स्थिति रहँदा जासूसीको ठूलो जालोलाई ध्वस्त पारेको दिल्ली प्रहरीको दाबी रहेको भारतीय सञ्चारमाध्यमहरूले लेखेका छन् । 


Advertisement

उनीसँगै एक चिनियाँ महिला र उनकी नेपाली सहयोगीलाई पनि प्रहरीले पक्राउ गरेको छ । उनीहरूले पत्रकार राजीव शर्मालाई संवेदनशील सूचना दिनका लागि ठूलै रकम दिएको दाबी दिल्ली प्रहरीले गरेको छ । 

‘स्पेसल सेलले स्वतन्त्र पत्रकार राजीव शर्मालाई पक्राउ गरेको छ । उनले संवेदनशील सूचना चिनियाँ गुप्तचरहरूलाई दिएका छन् । एक चिनियाँ महिला चिङ शी र उनकी नेपाली सहयोगी शेर सिंहलाई पनि पक्राउ गरिएको छ । उनीहरूले विभिन्न कम्पनीमार्फत विशाल रकम राजीव शर्मालाई पठाएको पत्ता लागेको छ । चिनियाँ गुप्तचरहरूले ती पत्रकारलाई मोटो रकम दिएर संवेदनशील सूचना हासिल गर्न अह्राएका थिए,’ प्रहरीले बतायो । 


Advertisement

‘थुप्रै मोबाइल फोन, ल्यापटप तथा अन्य संवेदनशील सामग्रीहरू बरामद गरिएको छ,’ प्रहरीले बतायो ।

शर्मा प्रेस इन्फर्मेसन ब्यूरोमा आधिकारिक रूपमा दर्ता भएमा पत्रकार हुन् र दिल्लीको पितमपुरामा बस्ने गर्छन् । उनलाई अघिल्लो सोमवार प्रहरीले दिल्लीबाट पक्राउ गरेको हो । 

‘उनीबाट रक्षा सम्बन्धी गोप्य दस्तावेजहरू फेला परेका छन् । अनुसन्धान जारी छ र विस्तृत विवरणहरू समय आएपछि साझा गरिनेछ,’ वरिष्ठ प्रहरी अधिकारी सञ्जीव कुमार यादवले बताए । 

प्रहरीका अनुसार, शर्माले प्रत्येक सूचनाका लागि एक हजार डलर पाइरहेका थिए र विगत डेढ वर्षमा ३० लाख भारु पाइसकेका थिए । उनले चीनको ग्लोबल टाइम्समा रक्षासम्बन्धी विषयमा लेख्ने गरेका थिए र उनलाई सन् २०१६ मा चिनियाँ एजेन्टहरूले भेटेका थिए । 

प्रेस क्लब अफ इन्डियाले चाहिँ प्रख्यात स्वतन्त्र पत्रकारलाई विश्वसनीय आधार नदिइकनै पक्राउ गरिएको भन्दै निन्दा गरेको छ ।

एजेन्सी
एजेन्सी

लेखकबाट थप...

कमेन्ट गर्नुहोस्