अमेरिकामा कोरोनाभाइरसका कारण मंगलवारसम्म २ लाखजनाले ज्यान गुमाइसकेको आँकडा सार्वजनिक भएपछि राष्ट्रपति डोनल्ड ट्रम्पले ‘यो लाजमर्दो हो’ भनी टिप्पणी गरेका छन् । 

यस विषयमा ट्रम्पलाई खोर्‍याएर सोध्दा उनले चीनमाथि दोषारोपण गरे अनि आफूले समयमै कारवाही नगरेको भए मृत्युुसंख्या अझै बढ्ने थियो भने । 

‘हामीले उपयुक्त तरिकाले सही काम नगरेको भए २५ लाखजना मरिसकेका हुन्थे । अझ त्यसभन्दा बढी मानिसको ज्यान गइसकेको हुन सक्थ्यो,’ ट्रम्पले मंगलवार ह्वाइट हाउसमा पत्रकारहरूसँग कुरा गर्दै भने । 

‘मैले संयुक्त राष्ट्रसंघमा गरेको सम्बोधनमा तपाईंले थाहा पाइहाल्नुभयो होला, चीनले आफ्नै सीमामा भाइरस रोक्न सक्थ्यो । उनीहरूले यसलाई संसारभरि फैलिन दिनै हुँदैनथियो, यो भयानक कुरा हो,’ उनले भने । 

आफूले देशमा बन्दाबन्दी नलगाएको भए ३० लाखभन्दा बढी मानिस मरिसक्थे भनी ट्रम्पले टिप्पणी गरे ।