बलिउड अभिनेत्रीहरूलाई सोधपुछका लागि बोलायो लागूऔषध नियन्त्रण विभागले

भारतको लागूऔषध नियन्त्रण विभाग (एनसीबी) ले बलिउडका शीर्ष अभिनेत्रीहरू दीपिका पादुकोण, श्रद्धा कपूर र सारा अली खानलाई सोधपुछका लागि बोलाएको छ । बलिउड कलाकारहरूले लागूऔषध सेवन गर्ने गरेको धमाधम खुलासा हुँदै जाँदा एनसीबीले अनुसन्धानको दायरा बढाइरहेको छ । 

उक्त निकायले दुईवटा मुद्दामा अनुसन्धान गरिरहेको छ : पहिलो, रिया चक्रवर्तीले आफ्ना प्रेमी सुशान्त सिंह राजपूतका लागि लागूऔषध ल्याउने र त्यसको पैसा तिर्ने गरेको विषयमा अनि दोस्रो, बलिउडमा व्याप्त रहेको लागूऔषध सेवनको समस्याका विषयमा ।
 


Advertisement

इन्फोर्समेन्ट डिरेक्टोरेटले रियाका ह्वाट्सयाप च्याट एनसीबीलाई पठाएपछि पहिलो केसको अनुसन्धानको बाटो खुलेको हो । अनि त्यसमा सोधपुछ गर्ने क्रममा दोस्रो केस दर्ता गरिएको हो । 

दोस्रो केसको अनुसन्धानका क्रममा अधिकारीहरूले सुशान्तकी व्यवस्थापक जया शाहसँग सोधपुछ गर्दा उनले गाँजाको बोटबाट बनाइने सीबीडी तेलको व्यवस्थापन गर्ने गरेको र श्रद्धा कपूर, सुशान्त, फिल्म निर्माता मधु मान्तेना अनि आफैंले उपयोग गर्ने गरेको बताइन् । 
 


Advertisement

दीपिकाले आफ्नी व्ववस्थापक करिश्मा प्रकाशसँग लागूऔषधका विषयमा गरेको ह्वाट्सयाप मेसेजमा एनसीबीले अनुसन्धान गर्न चाहेको छ । दीपिका र करिश्मालाई शुक्रवार बोलाइएको छ भने सारा र श्रद्धालाई शनिवार बोलाइएको छ ।

तर लागूऔषधका मुद्दामा दखदल राख्ने एक अधिवक्ताले नाम नखुलाउने शर्तमा बताएअनुसार, कलाकारहरूबाट लागूऔषध बरामद नगरिएकाले सोधपुछका लागि बोलाउने आधार पुष्टि नहुने बताए । ह्वाट्सयापका च्याटहरू प्राथमिक प्रमाण नभई परिपूरक प्रमाण मात्र भएको र यसलाई अदालतले शायदै स्वीकार गर्ने बताए । 
 

एजेन्सी
एजेन्सी

लेखकबाट थप...

कमेन्ट गर्नुहोस्