हिन्दू परम्परा अनुसार महिलाले सिन्दूर लगाउन नमान्नु भनेको विवाह अस्वीकार गर्नु हो भन्दै भारतको गौहाटी उच्च अदालतले एक पुरुषलाई आफ्नी पत्नीसँग पारपाचुकेका लागि अनुमति दिएको छ । पत्नीले छुट्टिएर बसेपछि सिन्दूर र शाखा (सीपीबाट बनेको बाला) लगाउन छोडेकी थिइन् । 

पतिले दिएको पुनरावेदनमा सुनुवाइ गर्दै मुख्य न्यायाधीश अजय लाम्बा र न्यायाधीश सौमित्र साइकियाले पारपाचुकेको अनुमति दिँदै उनले पत्नीविरुद्ध कुनै क्रूरता नगरेको ठहर गर्‍यो । फेमिली कोर्टले पारपाचुके गर्न नमिल्ने भनी गरेको फैसलालाई उच्च अदालतले उल्ट्याइदिएको छ । 
उनीहरूबीचको विवाह सन् २०१२ मा भएको थियो । परिवारबाट छुट्टिएर बस्ने भन्दै पत्नीले जिद्दी गर्न थालेपछि उनीहरूबीच झगडा हुन थाल्यो । त्यसपछि उनीहरू सन् २०१३ बाट छुट्टिएर बस्न थाले । 

पत्नीले पति तथा परिवारविरुद्ध यातना दिएको आरोप लगाउँदै उजुरी दर्ता गराएकी थिइन् तर उनीमाथि क्रूरता गरिएको भन्ने आरोप पुष्टि हुन सकेन, इजलासले भन्यो । 

‘पति र/वा पतिको परिवारका सदस्यविरुद्ध पुष्टि नभएको आरोपका आधारमा फौजदारी मुद्दा लगाउँदा पति वा परिवाप्रतिको क्रूरता ठहर हुने सर्वोच्च अदालतको फैसला छ,’ इजलासले फैसलामा भन्यो । 

महिलाले पतिलाई आफ्नी वृद्धा आमाप्रतिको कर्तव्य निर्वाह गर्न वञ्चित गरेको तथ्यलाई फेमिली कोर्टले बेवास्ता गरेको न्यायाधीशहरूको ठहर छ । 

‘क्रूरताको कार्य ठहर हुनका लागि यो प्रमाण पर्याप्त छ,’ आदेशमा लेखिएको छ ।