स्रोत भन्छ– ‘रेल र पानीजहाज मन्त्रालय बन्दैछ’

सरकारले जल र स्थल यातायातको समन्वय गर्ने गरी रेल र पानीजहाज मन्त्रालय स्थापना गर्ने तयारी गरेको छ ।

मन्त्रिपरिषद् पुनर्गठनमा रेल र पानीजहाज मन्त्रालय बनाउने गरी तयारी भइरहेको नेकपा स्रोतले बतायो । 


Advertisement

अहिले भौतिक पूर्वाधार तथा यातायात मन्त्रालयअन्तर्गत रेल र पानीजहाज कार्यालय छन् । भौतिक पूर्वाधारबाट यातायातलाई अलग गरेर नयाँ मन्त्रालय स्थापनाको तयारी भइरहेको स्रोतले बतायो । 

‘रेल र पानीजहाज मन्त्रालय स्थापना गर्ने मोटामोटी सहमति भइसकेको छ, मन्त्रिपरिषद्ले यसको निर्णय गर्ला,’ स्रोतले लोकान्तरसँग भन्यो ।


Advertisement

समुन्द्रमा नेपाली ध्वजाबाहक पानीजहाज चलाउने प्रधानमन्त्री केपी शर्मा ओलीको योजना छ । ओलीले मिति नै तोकेर पानीजहाज चल्ने संसदबाट घोषणा गरेका थिए । सरकारले दुई वर्षअघि नै ललितपुरमा पानीजहाज कार्यालय समेत स्थापना गरेको छ ।

पूर्वपश्चिम रेल सञ्चालन गर्ने नेकपाको चुनावी घोषणापत्र र सरकारको नीति तथा कार्यक्रममा उल्लेख छ ।

सोही घोषणालाई कार्यान्वयनमा ल्याउन रेल र पानीजहाज मन्त्रालय स्थापना गर्न लागिएको स्रोतले बतायो । 

स्थायी कमिटी र सचिवालय बैठकको निर्णयअनुसार प्रधानमन्त्री केपी शर्मा ओलीले मन्त्रिपरिषद् पुनर्गठनको गृहकार्य गरिरहेका छन् । 

नेकपा स्रोतले आज भोलिमै मन्त्रिपरिषद् पुनर्गठन हुने सम्भावना रहेको बतायो । कम्तिमा ८ जना मन्त्री फेरिने सम्भावना छ ।

मन्त्रिपरिषद् पुनर्गठनअघि नेकपाका अध्यक्षद्वय ओली र पुष्पकमल दाहाल प्रचण्डबीच आइतवार पनि छलफल भएको थियो । 

सचिवालय बैठकले मन्त्रिपरिषद् पुनर्गठनको अधिकार अध्यक्षद्वयलाई दिएको थियो । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्