लागू औषध अफिम सहित प्रहरीले ३ जनालाई पक्राउ गरेको छ । 

लागू औषध नियन्त्रण व्यूरो, कोटेश्‍वर, काठमाण्डौ र लागू औषध नियन्त्रण व्यूरो शाखा कार्यालय पोखराबाट खटिएको प्रहरी टोलीले शनिवार ३ जनालाई पक्राउ गरेको हो । 

पक्राउ पर्नेहरूमा कास्की पोखरा महानगरपालिका वडा नं. ६, स्कूलमार्ग स्थितबाट जिल्ला पुर्वी रुकुम पुथा उत्तरगंगा गाउँपालिका वडा नं. १ बस्ने वर्ष ५० का गज पुन, वर्ष ४० का चक्कर बहादुर पुन र गोरखा बारपाक सुलिकोट गाउँपालिका वडा नं. ६ बस्ने वर्ष २४ का रबि गुरुङ रहेका छन् । 

पक्राउ परेका गज पुन लामो समय देखि पुर्वी तथा पश्‍चिम रुकुम जिल्लाहरुमा अवैध लागू औषध अफिमको कारोवारमा सक्रिय भएको समेत खुलेको प्रहरीले जनाएको छ ।

उनीहरूको साथबाट अवैध लागू औषध अफिम १० के.जी. ५०० ग्राम र लागू औषध तौल गर्ने डिजिटल तराजु बरामद गरिएको प्रहरीको भनाइ छ ।
उनीहरूमाथि जिल्ला प्रहरी कार्यालय कास्कीबाट लागू औषध नियन्त्रण ऐन, २०३३ बमोजिम मुद्दा दर्ता गरी आवश्यक अनुसन्धान भईरहेको समेत प्रहरीले जनाएको छ ।