फेवातालमा फूट ट्रयाक बनाउन मुख्यमन्त्रीसहितको टोलीको रेखी

विजय उत्सव
विजय उत्सव

पत्रकार विजय उत्सव लोकान्तरका गण्डकी प्रदेश प्रतिनिधि हुन् ।

विश्व पर्यटन दिवस अवसरमा पोखराका पर्यटन व्यवसायीले सरोकारवाला निकायका प्रतिनिधि सहभागी गराएर ‘फेवा फेरो फूट ट्रयाक रेखी’ गरेका छन् । जसबाट पोखरामा आन्तरिक एवं बाह्य पर्यटन प्रवर्द्धन हुने र पर्यटकको बसाइँ लम्बिने आशा छ ।

यस वर्ष कोरोना भाइरस महामारीका कारण जनजीवन असहज बनेपछि विगतका जस्तो कार्यक्रम छोडेर यसपालि तालको दक्षिणी भेग रानीवनमा फूट ट्रयाक निर्माणमा दबाब दिन पर्यटन व्यवसायीहरुले डुंगा सयर गरी सो रेखी गरेका हुन् ।


Advertisement

प्रमुख अतिथि गण्डकी प्रदेशका मुख्यमन्त्री पृथ्वीसुव्वा गुरुङको उपस्थितिमा तालमा डुंगा सयर गर्दै सरोकारवाला निकाय प्रतिनिधिले सो अवलोकन भ्रमण गरेका हुन् ।

कार्यक्रममा करिब १० मोटरबोटमा ५० जना सहभागी भएर फेवाताल किनार ड्यामसाइड हुँदै तालबाराही मन्दिरसम्म फूटट्रयाक रेखी गरेका हुन् ।


Advertisement

टोलीमा मुख्यमन्त्री गुरुङ सहित प्रदेशका पर्यटन मन्त्री विकास लम्साल, प्रदेश सांसद राजीव पहारी, पोखरा महानगर मेयर मानबहादुर जिसी, वडाध्यक्ष, पर्यटन व्यवसायीको सहभागिता थियो ।

मुख्यमन्त्री गुरुङले फेवातालको सिमाङ्कन काम सकेपछि मात्रै रानीवन क्षेत्रमा फूटट्रयाक निर्माणका लागि लाग्ने बताए । उनले थलिएको पर्यटन क्षेत्र चलायमान बनाउन प्रदेश सरकारले विभिन्न कार्यक्रमहरु समेत गर्ने आश्वासन दिए ।

टान पोखराका अध्यक्ष हरि भुजेलले पोखरा घुम्न आउने पर्यटकको बसाइँ अवधि लम्ब्याउन फूटट्रयाक निर्माण बजेट विनियोजन भएपनि काम भने हुन नसकेका कारण सरोकारवालालाई अवलोकन गराएको बताए ।

यहाँ घुम्न आउने पर्यटकले तालको उत्तर भागबाटमात्रै हिमाल र ताल अवलोकन गर्दै आएकोमा सो निर्माणपछि तालको दक्षिणी भेगबाट ताल र हिमाललाई एकै नजरमा हेरेर रमाउन पाउने छन् ।

पोखरा घुम्न आउने पर्यटकको बसाइँ अवधि हाल २ देखि ३ दिनमात्र छ । फूट ट्रयाक निर्माणले थप १ दिन बसाइँ लम्बिने पर्यटन व्यवसायीहरुको  अनुमान छ ।

पोखरामा गत वर्ष करिब ४ लाख नेपाली र ४ लाख विदेशी पर्यटक घुम्न आएका थिए । नेपाल घुम्न आउने पर्यटकमध्ये ४० प्रतिशत यहाँ आउँछन् ।

फेवातालको उत्तरी भागमा यसअघि ५ किमी लम्बाइको फूट ट्रयाक निर्माण भैसकेको छ । पोखरा घुम्न आउने आन्तरिक एवं बाह्य पर्यटक बिहान–साँझ ताल किनारमा कावा खाँदै रमाउने गर्दछन् ।

पोखरामा निजी क्षेत्रबाट पर्यटन क्षेत्रमा ठूलो लगानी भएपनि कोरोना संक्रमणका कारण करिब ७ महिनादेखि यहाँको पर्यटन क्षेत्र चौपट भएको छ ।

 

विजय उत्सव
विजय उत्सव

लेखकबाट थप...

कमेन्ट गर्नुहोस्