आफूलाई कोरोना लागेमा भारतको पश्चिम बंगाल राज्यकी मुख्यमन्त्री ममता बनर्जीलाई अँगालो हालेर सारिदिने भनी भारतीय जनता पार्टीका राष्ट्रिय सचिव अनुपम हाजराले विवादास्पद बयान दिएका छन् ।

कोभिड–१९ का रोगीको परिवारको पीडा बुझाउनका लागि यस्तो गर्न खोजेको उनले बताए । 

उनको यस टिप्पणीका विरुद्ध तृणमूल कांग्रेस सिलिगुडीले प्रहरीमा एक उजुरी दर्ता गरेको छ । 

आइतवार बेलुका बरुइपुरमा आयोजित भाजपाको एक कार्यक्रममा उनले विवादास्पद बयान दिएका हुन् । 

‘हाम्रा कार्यकर्ताहरू कोरोनाभन्दा ठूला शत्रुविरुद्ध लडिरहेका छन् । ममता बनर्जीविरुद्ध उनीहरू लडिरहेका छन् । भाजपा क्याडरहरू ममता बनर्जीविरुद्ध मास्क नलगाइकन लड्न सफल भएका छन् भने कोरोनाविरुद्ध पनि मास्क नलगाइकन लड्न सफल हुनेछन्,’ उनले भने । 

‘मलाई कोरोनाभाइरस लाग्यो भने ममता बनर्जीलाई गएर अँगालो हाल्ने निर्णय लिएको छु,’ उनले भने । 
 

हाजरा पहिले तृणमूल कांग्रेसका विधायक थिए र पोहोर साल उनले भाजपामा प्रवेश गरेका हुन् । कोभिड–१९ बाट मरेकाहरूलाई राज्यले गरेको दाहसंस्कार दयनीय भएको उनले बताए । 
‘

उनले रोगीहरूलाई दयामाया देखाइनन् । उनीहरूको शरीर मट्टीतेल लगाएर डढाइयो । छोराहरूलाई कोडिका कारण मरेका आमाबुवाको अनुहार हेर्न समेत दिइएन । हामी मरेका कुकुर बिरालालाई पनि त्यस्तो व्यवहार गर्दैनौं,’ उनले भने । 
 

तृणमूल कांग्रेसका वरिष्ठ नेता सौगातो रोयले हाजराको टिप्पणीको भर्त्सना गरे र यसले भाजपाको सोचलाई प्रतिबिम्बित गर्ने बताए । 

दलको सिलिगुडी इकाइले हाजराविरुद्ध जुलूस निकाल्यो र उनीविरुद्ध प्रहरीमा उजुरी समेत दियो ।

ममता बनर्जीले नरेन्द्र मोदीलाई अपमानजनक शब्द प्रयोग गर्ने गरेको भन्दै हाजराले आफ्नो बचाउको प्रयास गरेका छन् ।