नेपाल आर्य समाजले ‘वैदिक वाङ्मयमा योग ज्ञान एवं साधना सप्ताह’ शिविर आयोजना गर्ने भएको छ ।

सोमवारदेखि प्रत्येक दिन बेलुकी ७ः३० देखि राति ९ बजेसम्म जुम प्रविधिबाट कार्यक्रम आयोजना गर्न लागिएको समाजका अध्यक्ष डा. माधवप्रसाद उपाध्यायले जानकारी दिए ।

सोमवार बेलुकी योगाचार्य सुवोध सिम्खडाले ‘वेद र योग विद्याको अन्तर सम्बन्ध’ विषयमा प्रवचनका साथमा साधना गराउने छन् । असोज १३ गते डा. राजु अधिकारीले ‘योग वेददेखि विश्वसम्म’, असोज १४ गते योगाचार्य उमाशंकर जोशीले ‘वेदान्त दर्शनमा योग ज्ञान’ र असोज १५ गते योगाचार्य फलनारायण पोखरेलले ‘श्रीमद्भवद्गीतामा योगको स्वरुप’का विषयमा प्रशिक्षण दिनेछन् ।

असोज १६ गते डा. चिन्तामणि गौतमले ‘उपनिषद्मा योग विद्या’, असोज १७ गते डा. टिपी धमलाले ‘उपनिषद्मा योग ज्ञान एवं साधना’ र असोज १८ गते डा. क्षितिज बराकोटीले ‘वैदिक वाङ्मयमा मानसिक स्वास्थ्य’ विषयमा प्रवचनका साथै योग साधनासमेत गराउनुहुने समाजले जनाएको छ । साधना शिविरमा सहभागी हुन चाहनेले समाजको केन्द्रीय कार्यालयमा सम्पर्क गरी जुम आइडी र पासवर्ड प्राप्त गरेर सहभागी हुन सक्ने जनाइएको छ ।

समाजको फेसबूक पेजबाट समेत कार्यक्रम प्रत्यक्ष प्रसारण गरिने छ ।