कोरोना महामारीका कारण साना नाकामा सुरक्षाकर्मीको निगरानी फितलो भएको मौका छोप्दै मानव तस्करले प्रलोभन दिएर नेपाली बालकलाई भारतका विभिन्न सहरमा पुर्‍याउने गरेको तथ्य खुलेको छ ।

सोमबार साँझ भारतको राजधानी नयाँदिल्ली छेउको गाजियाबादबाट १८ नेपाली बालकको उद्धार भएपछि यसबारे खुलासा भएको हो ।

आकर्षक कमाइको प्रलोभन दिँदै काममा लगाइदिने भनेर तस्करहरूले ती बालक ल्याएका थिए । तर उनीहरूको योजना पूरा हुनुअघि नै प्रहरीले दिल्ली महिला आयोग र केआई नेपालसँगको समन्वयमा गाजियाबादबाट ती बालकलाई उद्धार गरेको हो ।

१३ देखि १६ वर्ष उमेरका यी बालक नवलपरासी जिल्लाका हुन् । तीन जना दलालले नवलपरासीको ठुठीबारी नाका हुँदै ती बालकलाई भारतमा पुर्‍याएको केआई नेपालका भारत प्रतिनिधि नवीन जोशीले बताए । ‘राम्रो कमाइ हुने काममा लगाइदिन्छु भन्दै दलालहरूले ल्याएका रहेछन्,’ उनले भने ।

मानव तस्करले नेपाली बालकलाई दिल्ली पुर्‍याउन लागेको गोप्य सूचनाका आधारमा स्थानीय प्रहरीले नेपालबाट आउने गाडीहरूमा निगरानी बढाएको थियो । प्रहरीले तस्करीमा संलग्न तीन जनालाई पनि नियन्त्रणमा लिएको छ ।

उद्धार गरिएका सबै बालकलाई दिल्ली महिला आयोगको आश्रयस्थलमा राखिएको छ । खाडीलगायत विभिन्न मुलुक पठाइदिने भन्दै नेपाली महिलालाई भारतको दिल्लीलगायत विभिन्न सहर पुर्‍याउन मानव तस्करको ठूलो सञ्जाल सक्रिय रहँदै आएको छ ।

मानव तस्करले यति ठूलो संख्यामा साना बालकलाई भारत पुर्‍याएको घटना भने नौलो हो । नेपाली बालकहरू आफन्तको साथ लागेर रोजगारीका लागि भारतका विभिन्न सहर आउनु सामान्य हो । तर, पछिल्लो घटनाले मानव तस्करले कलिला बालकलाई पनि आफ्नो निसानामा पार्न थालेको देखाउँछ ।