ट्रम्पको कारोबार निरन्तर घाटामा, यस्तो छ विवरण

द न्युयोर्क टाइम्स पत्रिकाले प्रकाशन गरेको खोजमूलक समाचारमा अमेरिकी राष्ट्रपति डोनल्ड ट्रम्पको व्यापार साम्राज्य उनले दाबी गरे जस्तो सफल नरहेको बलियो प्रमाण हो । 

ट्रम्पले वर्षौंदेखि आफ्नो व्यापारिक सुझबुझको फुर्ती लगाउने गरेका छन् । राष्ट्रपति बन्नका लागि अरूभन्दा यो राम्रो रणनीति भएको उनले बताउने गरेका छन् । 


Advertisement

‘मैले गजबका सम्झौताहरू गरेको थिएँ । युवावस्थामै मैले ती सम्झौता गरेको थिएँ । अहिले मैले संसारभरि भवन बनाइसकेको छु र कामप्रति मेरो प्रेम छ,’ सन् २०१५ को जुन महिनामा उनले राष्ट्रपति उम्मेदवार बन्ने घोषणा गर्दा भनेका थिए । ‘म आफ्नो सफलताप्रति गर्व गर्छु ।’

तर ट्रम्प राजनीतिक वृत्तमा आएपछि त्यस फुर्तीमा जटिलता आएका छन् । विभिन्न समाचारहरूमा ट्रम्प कतिपटक टाट पल्टेको र उनको आर्थिक सफलतामा उनका पिताको हात रहेको बताइएको छ । 


Advertisement

आइतवार द न्युयोर्क टाइम्सले प्रकाशन गरेको खबर ट्रम्पको वित्तीय कारोबारमाथिको सबभन्दा गहन अनुसन्धान हो । उक्त पत्रिकामा ट्रम्पको कर विवरण हेर्दा उनी लाखौं डलर लिने तर निरन्तर घाटामा गइरहने देखिने भनी लेखिएको छ । 

‘ट्रम्पले गरेको कर दाखिला र उनका सयौं कारोबारहरूले उनको खोक्रोपनका साथै चमत्कार पनि देखाउँछ,’ पत्रिकाले निष्कर्ष निकालेको छ । ‘उनी वास्तविकतामा आधारित नभई ठूलो व्यापारी भएको ढोङ गर्न सफल छन् ।’

ट्रम्पले न्युयोर्क टाइम्समा आएको समाचारको खण्डन गर्दै टन्नै कर दाखिला गर्ने गरेको बताए । ‘म टन्नै आयकर तिर्छु,’ उनले भने । ट्रम्प अर्गनाइजेसनका एक वकिलले पत्रिकामा आएका सबै नभए पनि धेरै तथ्यहरू त्रुटिपूर्ण रहेको बताए । 

द न्युयोर्क टाइम्सको खोजमूलक समाचारले पत्ता लगाएअनुसार, ट्रम्पले १८ मध्ये ११ वर्ष आयकर तिरेनन् । उनले सन् २०१६ र २०१७ मा जम्मा ७५० डलर आयकर तिरे । यस्तो कसरी सम्भव भयो भन्ने विषयमा पनि समाचारमा उल्लेख गरिएको छ । 

‘आफ्नो करीयरमा ट्रम्पका कारोबारहरू घाटामा गएका छन् । वर्षभरि अन्य आयमाथिको कर घटाउनका लागि जम्मा हुने रकमभन्दा पनि बढी घाटा उनले बेहोरेका छन् । तर करसम्बन्धी नियममा एउटा सुविधा छ । केही नियन्त्रण सहित व्यापारीहरूले आगामी वर्षमा कर छुट गराउन पुराना रहलपहल घाटाहरू अगाडि बढाउन पाउँछन्,’ समाचारमा लेखिएको छ । 

खोजले देखाएअनुसार, ट्रम्पका केही कम्पनीहरूले नाफा गराइरहेका छन् भने अन्य कम्पनीहरू घाटामा छन् । उनका प्रख्यात व्यवसायहरूले वर्षैपिच्छे लाखौं डलर घाटा गराएको देखाएको छ । उनका प्रख्यात गल्फ कोर्सहरूले विगत दुई दशकमा साढे ३१ करोड डलर घाटा गराएको देखिन्छ । 
 

एजेन्सी
एजेन्सी

लेखकबाट थप...

कमेन्ट गर्नुहोस्