भारतको मुम्बई प्रहरीले बुधवार फिल्म निर्माता अनुराग कश्यपलाई बिहीवार बयानका लागि बोलाएको छ । 

अभिनेत्री पायल घोषले कश्यपविरुद्ध यौन दुर्व्यवहारको आरोप लगाउँदै उजुरी दर्ता गरेपछि प्रहरीले कश्यपलाई बोलाएको हो । 

कश्यप बिहीवार वर्सोवा प्रहरीलाई बयान दिन जाँदैछन् । 

सात वर्षअघि आफूलाई कश्यपले बलात्कार गरेको पायल घोषले आरोप लगाएकी छन् । 
 

पायलका वकिल नितिन सतपुरेले भने, ‘बलात्कार, गलत नियन्त्रण, गलत तरिकाले कैदमा राखेको अनि महिलाको मर्यादामाथि आघात गरेको कसूरविरुद्ध उजुरी गरिएको छ ।’

आफूमाथि लगाइएका आरोपहरू झूटो भएको कश्यपले बताएका छन् । 

सोमवार पायलले रिपब्लिकन पार्टी अफ इन्डियाका अध्यक्ष रामदास आठवलेसँग संयुक्त पत्रकार सम्मेलनमा बोल्दै कश्यपलाई पक्राउ गर्न माग गरिन् । 

सोमवार उनले मुम्बईका जोइन्ट कमिस्नर अफ पुलिस विश्वास नांगरे पाटिललाई भेटेर कश्यपविरुद्ध कारवाहीको माग गरिन् । 

उनले आठवलेसँग मिलेर महाराष्ट्रका राज्यपाल बीएस कोशियारीलाई पनि स्मरणपत्र दिइन् ।